น มํ สีตํ น มํ อุณฺหํ น มํ ชาลสฺมิ พาธนํ

ยญฺจ มํ มญฺญเต มจฺฉี อญฺญํ โส รติยา คโตติ ฯ

ตตฺถ น มํ สีตํ น มํ อุณฺหนฺติ มจฺฉานํ อุทกา นีหฏกาเล สีตํ โหติ ตสฺมึ วิคเต อุณฺหํ โหติ ฯ ตทุภยมฺปิ สนฺธาย น มํ สีตํ น มํ อุณฺหํ พาธตีติ ปริเทวติ ฯ ยมฺปิ องฺคาเรสุ ปจนมูลกํ ทุกฺขํ ภวิสฺสติ ตมฺปิ สนฺธาย น มํ อุณฺหนฺติ ปริเทวเตว ฯ น มํ ชาลสฺมิ พาธนนฺติ ยมฺปิ ชาลสฺมึ พาธนํ อโหสิ ตมฺปิ มํ น พาเธสีติ ปริเทวติ ฯ ยญฺจ มนฺติ อาทีสุ อยํ ปิณฺฑตฺโถ สา มจฺฉี มม ชาเล ปติฏฺฐิตสฺส อิเมหิ เกวฏฺเฏหิ คหิตภาวํ อชานนฺตี มํ อปสฺสมานา โส มจฺโฉ อิทานิ อญฺญํ มจฺฉึ กามรติยา คโต ภวิสฺสตีติ จินฺเตสิ ตํ ตสฺสา โทมนสฺสปฺปตฺตาย จินฺตนํ มํ พาธตีติ วาลุกปิฏฺเฐ นิปนฺโนว ปริเทวติ ฯ

ตสฺมึ สมเย ปุโรหิโต ทาสปริวุโต นฺหานตฺถาย นทีตีรํ อาคโต ฯ โส ปน สพฺพรุทญฺญู โหติ ฯ เตนสฺส มจฺฉํ ปริเทวิตํ สุตฺวา เอตทโหสิ อยํ มจฺโฉ กิเลสปริเทวิตํ ปริเทวติ เอวํ อาตุรจิตฺโต โข ปเนส มิยฺยมาโน นิรเยเยว นิพฺพตฺติสฺสติ อหํ อิมสฺส อวสฺสโย ภวิสฺสามีติ ฯ เกวฏฺฏานํ สนฺติกํ คนฺตฺวา อมฺโภ ตุมฺเห อมฺหากํ เอกทิวสมฺปิ พฺยญฺชนตฺถาย มจฺฉํ น เทถาติ อาห ฯ เกวฏฺฏา กึ วเทถ สามิ ตุมฺหากํ รุจฺจนกํ มจฺฉํ คณฺหิตฺวา คจฺฉถาติ อาหํสุ ฯ อมฺหากํ อญฺเญน กมฺมํ นตฺถิ อิมญฺเญว เทถาติ ฯ คณฺหถ สามีติ ฯ โพธิสตฺโต ตํ อุโภหิ หตฺเถหิ คเหตฺวา นทีตีเร นิสีทิตฺวา อมฺโภ มจฺฉ สเจ ตาหํ อชฺช น ปสฺเสยฺยํ ชีวิตกฺขยํ ปาปุเณยฺยาสิ อิทานิ อิโต ปฏฺฐาย มา กิเลสวสิโกว อโหสีติ โอวทิตฺวา อุทเก วิสฺสชฺเชตฺวา นครํ ปาวิสิ ฯ