เต ตสฺส วจนํ สุตฺวา สาธุ เทว คมิสฺสาม น ปนมฺหากํ ราชกุเลนตฺโถ อตฺถิ ปุโรหิตสฺส เคเห นิพฺพตฺเตตฺวา ทหรกาเลเยว กาเม ปหาย ปพฺพชิสฺสามาติ วทึสุ ฯ สกฺโก สาธูติ เตสํ ปฏิญฺญํ คเหตฺวา อาคนฺตฺวา รุกฺขเทวตาย ตมตฺถํ อาโรเจสิ ฯ สา ตุฏฺฐมานสา สกฺกํ วนฺทิตฺวา อตฺตโน วิมานเมว คตา ฯ ปุโรหิโตปิ ปุนทิวเส พลวปุริเส สนฺนิปาตาเปตฺวา วาสิผรสุอาทีนิ คาหาเปตฺวา รุกฺขมูลํ คนฺตฺวา รุกฺขสาขาย คเหตฺวา อมฺโภ เทวเต อชฺช มยฺหํ ปุตฺตํ ยาจนฺตสฺส สตฺตโม ทิวโส อิทานิ เต นิฏฺฐานกาโลติ อาห ฯ ตโต รุกฺขเทวตา มหนฺเตนานุภาเวน ขนฺธวิวรโต นิกฺขมิตฺวา มธุเรน สเรน ตํ อามนฺเตตฺวา พฺราหฺมณ ติฏฺฐตุ เอโก ปุตฺโต จตฺตาโร เต ปุตฺเต ทสฺสามีติ อาห ฯ มม ปุตฺเตนตฺโถ นตฺถิ อมฺหากํ รญฺโญ ปุตฺตํ เทหีติ ฯ ตุยฺเหว ทมฺมีติ ฯ เตนหิ มม เทฺว เทหิ รญฺโญ เทฺว เทหีติ ฯ รญฺโญ น เทมิ จตฺตาโรปิ ตุยฺเหว เทมิ ตยา จ ลทฺธมตฺตาว ภวิสฺสนฺติ อคาเร อฐตฺวา ทหรกาเลเยว ปพฺพชิสฺสนฺตีติ ฯ ตฺวํ รญฺโญ เกวลํ ปุตฺเต เทหิ อปพฺพชฺชนการณํ ปน อมฺหากํ ภาโรติ ฯ สา ตสฺส ปุตฺตวรํ ทตฺวา อตฺตโน ภวนํ ปาวิสิ ฯ ตโต ปฏฺฐาย เทวตาย สกฺกาโร มหา ปวตฺตติ ฯ เชฏฺฐกเทวปุตฺโต จวิตฺวา ปุโรหิตสฺส พฺราหฺมณิยา กุจฺฉิมฺหิ นิพฺพตฺติ ฯ ตสฺส นามคหณทิวเส หตฺถิปาโลติ นามํ กตฺวา อปพฺพชฺชนตฺถาย หตฺถิโคปเก ปฏิจฺฉาเปสุํ ฯ โส เตสํ สนฺติเก วฑฺฒติ ฯ ตสฺส ปทสา คมนกาเล ทุติโย จวิตฺวา ตสฺสา กุจฺฉิมฺหิ นิพฺพตฺติ ฯ ตสฺสาปิ ชาตกาเล อสฺสปาโลติ นามํ กรึสุ ฯ โส อสฺสโคปกานํ สนฺติเก วฑฺฒติ ฯ ตติยสฺส ชาตกาเล โคปาโลติ นามํ กรึสุ ฯ โส โคปาลเกหิ สทฺธึ วฑฺฒติ ฯ จตุตฺถสฺส ชาตกาเล อชปาโลติ นามํ กรึสุ ฯ โส อชปาเลหิ สทฺธึ วฑฺฒติ ฯ เต วุฑฺฒิมนฺวาย โสภคฺคปฺปตฺตา อเหสุํ ฯ

อถ เนสํ ปพฺพชิตภเยน รญฺโญ วิชิตา ปพฺพชิเต นีหรึสุ ฯ สกลกาสิกรฏฺเฐ เอกปพฺพชิโตปิ นาโหสิ ฯ เต กุมารา อติผรุสา อเหสุํ ฯ ยาย ทิสาย คจฺฉนฺติ ตาย ทิสาย อาหริยมานํ ปณฺณาการํ วิลุมฺปนฺติ ฯ หตฺถิปาลสฺส โสฬสวสฺสกาเล สรีรสมฺปตฺตึ ทิสฺวา ราชา จ ปุโรหิโต จ กุมารา มหลฺลกา ชาตา ฉตฺตุสฺสาปนสมโย เตสํ กินฺนุ โข กาตพฺพนฺติ มนฺเตตฺวา เอเต อภิสิตฺตกาลโต ปฏฺฐาย อติสูรา ภวิสฺสนฺติ ตโต ตโต ปพฺพชิตา อาคมิสฺสนฺติ เต ทิสฺวา ปพฺพชิสฺสนฺติ เอเตสํ ปพฺพชิตกาเล ชนปทา อุลฺโลลา ภวิสฺสนฺติ วีมํสิสฺสาม ตาว เน ปจฺฉา อภิสิญฺจิสฺสามาติ จินฺเตตฺวา อุโภปิ อิสิเวสํ คเหตฺวา ภิกฺขาย จรนฺตา หตฺถิปาลกุมารสฺส นิเวสนทฺวารํ อคมํสุ ฯ กุมาโร เต ทิสฺวา ตุฏฺโฐ ปสนฺโน อุปสงฺกมิตฺวา วนฺทิตฺวา ติสฺโส คาถา อภาสิ