เอวํปิ พฺยาธิ สสตํ ชรา จ

อุปเนติ มจฺจุวสมนฺตกสฺสาติ ฯ

ตตฺถ สกฺขีติ มิตฺตธมฺโม ฯ มรเณนาติ ทตฺโต มิตฺโต มโตติ สมฺมติมรเณน ฯ ชรายาติ ปากฏชราย หิ สทฺธึ ยสฺส เมตฺตี ภเวยฺย ยสฺเสตํ มรณญฺจ ชรา จ มิตฺตภาเวน นาธิคจฺเฉยฺยาติ อตฺโถ ฯ เอเรติ เจนนฺติ มหาราช ยถา นาม ปุริโส นทีติตฺเถ อุทกมฺหิ นาวํ ฐเปตฺวา ปรตีรคามิชนํ อาโรเปตฺวา สเจ อริตฺเตน อุปฺปีเฬนฺโต ปิเยน วา กฑฺฒนฺโต จาเลติ ฆเฏติ อถ นํ ปรตีรํ อุปเนติ เอวํ พฺยาธิ จ ชรา จ นิจฺจํ อนฺตกสฺส มจฺจุโน วสํ อุปเนนฺติเยวาติ ฯ

เอวํ อิเมสํ สตฺตานํ ชีวิตสงฺขารสฺส ปริตฺตภาวํ ทสฺเสตฺวา มหาราช ตุมฺเห ติฏฺฐถ ตุมฺเหหิ สทฺธึ กเถนฺตเมว มํ พฺยาธิ จ ชรา จ มรณํ จ อุปคจฺฉนฺติ อปฺปมตฺตา โหถาติ โอวาทํ ทตฺวา ราชานญฺจ ปิตรญฺจ วนฺทิตฺวา อตฺตโน ปริจาริเก คเหตฺวา พาราณสิรชฺชํ ปหาย ปพฺพชิสฺสามีติ นิกฺขมิ ฯ ปพฺพชฺชา นาม เอสา โสภนา ภวิสฺสตีติ หตฺถิปาลกุมาเรน สทฺธึ มหาชโน นิกฺขมิ ฯ โยชนิกา ปริสา อโหสิ ฯ โส ตาย ปริสาย สทฺธึ คงฺคาตีรํ ปตฺวา คงฺคาย อุทกํ โอโลเกตฺวา กสิณปริกมฺมํ กตฺวา ฌานํ นิพฺพตฺเตตฺวา จินฺเตสิ อยํ สมาคโม มหา ภวิสฺสติ มม ตโย กนิฏฺฐภาตโร มาตาปิตโร ราชา เทวีติ สพฺเพ สปริสา ปพฺพชิสฺสนฺติ พาราณสี สุญฺญา ภวิสฺสติ ยาว เอเตสํ อาคมนา อิเธว วสิสฺสามีติ ฯ โส ตตฺเถว มหาชนสฺส โอวาทํ ททนฺโต นิสีทิ ฯ ปุนทิวเส ราชา จ ปุโรหิโต จ จินฺตยึสุ หตฺถิปาลกุมาโร ตาว รชฺชํ ปหาย มหาชนํ อาทาย ปพฺพชิสฺสามีติ คนฺตฺวา คงฺคาตีเร นิสีทิ อสฺสปาลํ วีมํสิตฺวา อภิสิญฺจิสฺสามาติ ฯ เต อิสิเวเสเนว ตสฺสาปิ เคหทฺวารํ อคมํสุ ฯ โสปิ เต ทิสฺวา ปสนฺนมานโส อุปสงฺกมิตฺวา จิรสฺสํ วต ปสฺสามีติ อาทีนิ วตฺวา ตเถว ปฏิปชฺชิ ฯ เตปิ ตํ ตเถว วตฺวา อตฺตโน อาคตการณํ กถยึสุ ฯ โส มม ภาติเก หตฺถิปาลกุมาเร สนฺเต ปฐมตรํ มยฺหเมว เสตจฺฉตฺตํ ปาปุณาตีติ ปุจฺฉิตฺวา ตาต ภาตา เตน มยฺหํ รชฺเชนตฺโถ ปพฺพชิสฺสามีติ วตฺวา นิกฺขนฺโตติ วุตฺเต กหํ ปน โส อิทานีติ คงฺคาตีเร นิสินฺโนติ วุตฺเต ตาต มม ภาตรา ฉฑฺฑิตเขเฬน มม กมฺมํ นตฺถิ พาลา หิ ปริตฺตปญฺญา สตฺตา เอตํ กิเลสํ ปชหิตุํ น สกฺโกนฺติ อหํ ปน ชหิสฺสามีติ ฯ รญฺโญ จ ปิตุ จ ธมฺมํ เทเสนฺโต เทฺว คาถา อภาสิ