ตตฺถ ปงฺโกติ โย โกจิ กทฺทโม ฯ ปลิโปติ สุขุมวาลิกมิสฺโส สณฺหกทฺทโม ฯ ตตฺถ กาโม ลคฺคาปนวเสน ปงฺโก นาม โอสีทาปนวเสน ปลิโป นามาติ วุตฺโต ฯ ทุตฺตราติ ทูรติกฺกมา ฯ มจฺจุเธยฺยาติ มจฺจุโน อธิฏฺฐานํ ฯ เอเตสุ หิ ลคฺคา เจว อนุปวิฏฺฐา จ สตฺตา อุตฺตริตุํ อสกฺโกนฺตา ทุกฺขกฺขนฺธปริยาเย วุตฺตปฺปการํ ทุกฺขญฺเจว มรณญฺจ ปาปุณนฺติ ฯ เตนาห เอตสฺมึ ปงฺเก ปลิเป วิสนฺนา หีนตฺตรูปา น ตรนฺติ ปารนฺติ ฯ ตตฺถ วิสนฺนาติ พฺยสนฺนา ฯ พฺยสนฺนาติปิ ปาโฐ อยเมว อตฺโถ ฯ หีนตฺตรูปาติ หีนจิตฺตสภาวา ฯ ปารนฺติ นิพฺพานปารํ คนฺตุํ น สกฺโกนฺติ ฯ อยนฺติ มหาราช อยํ มมตฺตภาโว ปุพฺเพ อสฺสโคปเกหิ สทฺธึ วฑฺฒนฺโต มหาชนสฺส วิลุมฺปนเหฐนาทิวเสน พหุํ ลุทฺทํ สาหสิกกมฺมํ อกาสิ ฯ สฺวายํ คหีโตติ โส อยํ ตสฺส กมฺมสฺส วิปาโก มยา คหิโต ฯ น หิ โมกฺขิโต เมติ สํสารปฺปวตฺเต สติ นหิ โมกฺโข อิโต อกุสลผลโต มมตฺถิ ฯ โอรุนฺธิยา นํ ปริรกฺขิสฺสามีติ อิทานิ นํ กายวจีมโนทฺวารานิ ปิทหนฺโต โอรุนฺธิตฺวา ปริรกฺขิสฺสามิ ฯ กึการณา ฯ มายํ ปุน ลุทฺทมกาสิ กมฺมนฺติ อหํ หิ อิโต ปฏฺฐาย ปาปํ อกตฺวา กลฺยาณเมว กริสฺสามิ ฯ

ติฏฺฐถ ตุมฺเห ตุมฺเหหิ สทฺธึ กเถนฺตเมว มํ พฺยาธิชรามรณานิ อุปคจฺฉนฺตีติ โอวาทํ ททนฺโต โยชนิกํ ปริสํ คเหตฺวา นิกฺขมิตฺวา หตฺถิปาลกุมารสฺเสว สนฺติกํ คโต ฯ โส ตสฺส อากาเส นิสีทิตฺวา ธมฺมํ เทเสนฺโต ภาติก อยํ สมาคโม มหา ภวิสฺสติ อิเธว ตาว โหมาติ อาห ฯ อิตโรปิ สาธูติ สมฺปฏิจฺฉิ ฯ ปุนทิวเส ราชา จ ปุโรหิโต จ เตเนวูปาเยน โคปาลกุมารสฺส นิเวสนํ คนฺตฺวา เตนาปิ ตเถว ปฏินนฺทิตา อตฺตโน อาคมนการณํ อาจิกฺขึสุ ฯ โสปิ อสฺสปาลกุมาโร วิย ปฏิกฺขิปิตฺวา อหํ จิรโต ปฏฺฐาย ปพฺพชิตุกาโม วเน นฏฺฐโคณํ วิย ปพฺพชฺชํ อุปธาเรนฺโต วิจรามิ เตน เม นฏฺฐโคณสฺส ปทํ วิย ภาติกานํ คตมคฺโค ทิฏฺโฐ สฺวาหํ เตเนว มคฺเคน คมิสฺสามีติ วตฺวา คาถมาห

ควํว นฏฺฐํ ปุริโส ยถา วเน

อนฺเธ สติ ราช อปสฺสมาโน