ตตฺถ ภุตฺวา วมิตฺวา จาติ มํสํ ขาทิตฺวา วมิตฺวา จ ฯ ปจฺจาวมิสฺสสีติ ปฏิปริภุญฺชิสฺสสิ ฯ วนฺตาโทติ ปรสฺส วมิตขาทโก ฯ น ปสํสิโยติ โส ตณฺหาย วสิโก พาโล พุทฺธาทีหิ ปณฺฑิเตหิ ปสํสิตพฺโพ น โหตีติ ฯ

ตํ สุตฺวา ราชา วิปฺปฏิสารี อโหสิ ฯ ตโย ภวา อาทิตฺตา วิย อุปฏฺฐหึสุ ฯ โส อชฺเชว รชฺชํ ปหาย มม ปพฺพชิตุํ วฏฺฏตีติ อุปฺปนฺนสํเวโค เทวิยา ถุตึ กโรนฺโต คาถมาห

ปงฺเก จ โปสํ ปลิเป พฺยสนฺนํ

พลี ยถา ทุพฺพลํ อุทฺธเรยฺย