สีติภูตา สพฺพมติจฺจ สงฺคนฺติ ฯ

ตตฺถ เอกาติ ปุตฺตธีตุกิเลสสมฺพาเธหิ มุจฺจตฺวา อิมสฺมึ โลเก เอกิกาว วิจริสฺสามิ ฯ กามานีติ รูปาทโย กามคุเณ ฯ ยโถธิกานีติ เยน เยน โอธินา ฐิตานิ เตน เตน ตถา ฐิตาเนว ชหิสฺสามิ น กิญฺจิ อามสิสฺสามีติ อตฺโถ ฯ อจฺเจนฺติ กาลาติ ปุพฺพณฺหาทโย กาลา อติกฺกมนฺติ ฯ ตรยนฺตีติ อตุจฺฉา หุตฺวา อายุสงฺขารํ เขปยมานา ขาทยมานา คจฺฉนฺติ ฯ วโยคุณาติ ปฐมวยาทโย ตโย มนฺททสกาทโย วา ทสโกฏฺฐาสา ฯ อนุปุพฺพํ ชหนฺตีติ อุปรูปริโกฏฺฐาสํ อปตฺวา ตตฺถ ตตฺเถว นิรุชฺฌนฺติ ฯ สีติภูตาติ อุณฺหการเก อุณฺหสภาเว กิเลเส ปหาย สีตลา หุตฺวา ฯ สพฺพมติจฺจ สงฺคนฺติ ราคสงฺคาทิกํ สพฺพสงฺคํ อติกฺกมิตฺวา เอกิกา จริสฺสามิ หตฺถิปาลสฺส กุมารสนฺติกํ คนฺตฺวา ปพฺพชิสฺสามิ ฯ

อิติ สา อิมาหิ คาถาหิ มหาชนสฺส ธมฺมํ เทเสตฺวา อมจฺจภริยาโย ปกฺโกสาเปตฺวา อาห ตุมฺเห กึ กริสฺสถาติ ฯ ตุมฺเห ปน อยฺเยติ ฯ อหํ ปพฺพชิสฺสามีติ ฯ มยํปิ ปพฺพชิสฺสามาติ ฯ สา สาธุ อยฺยาโยติ ฯ ราชนิเวสเน สุวณฺณโกฏฺฐาคารทฺวาราทีนิ วิวราเปตฺวา อสุกฏฺฐาเน จ อสุกฏฺฐาเน จ มหานิธานํ นิหิตนฺติ สุวณฺณปฏฺเฏ ลิขาเปตฺวา ทินฺนญฺเญว อตฺถิกา หรนฺตูติ วตฺวา สุวณฺณปฏฺฏํ มหาตลถมฺเภ พนฺธาเปตฺวา นคเร เภริญฺจาราเปตฺวา มหาสมฺปตฺตึ ฉฑฺเฑตฺวา นครา นิกฺขมิ ฯ ตสฺมึ ขเณ สกลนครํ สงฺขุพฺภิ ราชา จ กิร เทวี จ รชฺชํ ปหาย ปพฺพชิสฺสามาติ นิกฺขนฺตา มยํ อิธ กึ กริสฺสามาติ ฯ ตโต มนุสฺสา ยถาปูริตาเนว เคหานิ ฉฑฺเฑตฺวา ปุตฺเต หตฺเถ คเหตฺวา นิกฺขมึสุ ฯ สพฺพาปณา ปสาริตนิยาเมเนว ฐิตา นิวตฺเตตฺวา โอโลเกนฺโต นาม นาโหสิ ฯ สกลนครํ ตุจฺฉํ อโหสิ ฯ เทวีปิ ติโยชนิกํ ปริสํ คเหตฺวา ตตฺเถว คตา ฯ หตฺถิปาโล ตสฺสาปิ ปริสาย อากาเส นิสินฺโน ธมฺมํ เทเสตฺวา ตํ ทฺวาทสโยชนิกํ ปริสํ คเหตฺวา หิมวนฺตาภิมุโข ปายาสิ ฯ หตฺถิปาลกุมาโร กิร ทฺวาทสโยชนิกํ ปริสํ คเหตฺวา พาราณสึ ตุจฺฉํ กตฺวา ปพฺพชิสฺสามีติ มหาชนํ อาทาย หิมวนฺตํ คจฺฉติ กิมงฺคํ ปน มยนฺติ สกลกาสิกรฏฺฐํ สงฺขุพฺภิ ฯ อปรภาเค ปริสา ตึสโยชนิกา อโหสิ ฯ โส ตาย ปริสาย สทฺธึ หิมวนฺตํ คนฺตฺวา ปาวิสิ ฯ สกฺโก อาวชฺเชนฺโต ตํ ปวุตฺตึ ญตฺวา หตฺถิปาลกุมาโร มหาภินิกฺขมนํ นิกฺขนฺโต สมาคโม มหา ภวิสฺสติ วสนฏฺฐานํ ลทฺธุํ วฏฺฏตีติ วิสฺสกมฺมํ อาณาเปสิ คจฺฉ วิสฺสกมฺม อายามโต ฉตฺตึสโยชนิกํ วิตฺถารโต ปณฺณรสโยชนํ อสฺสมํ มาเปตฺวา ปพฺพชิตปริกฺขาเร สมฺปาเทหีติ ฯ โส สาธูติ ปฏิสฺสุณิตฺวา คงฺคาตีเร รมณีเย ภูมิภาเค วุตฺตปฺปมาณํ อสฺสมปทํ มาเปตฺวา ปณฺณสาลาสุ กฏฺฐตฺถรปณฺณตฺถรอาสนาทีนิ ปญฺญเปตฺวา สพฺเพ ปพฺพชิตปริกฺขาเร มาเปสิ ฯ เอเกกิสฺสา จ ปณฺณสาลาย ทฺวาเร เอเกโก จงฺกโม รตฺติฏฺฐานทิวาฏฺฐานปริจฺฉินฺโน กตสุธาปริกมฺโม อาลมฺพณผลโก เตสุ ฐาเนสุ นานาตรุณวนสุรภิ- กุสุมสญฺฉนฺนา ปุปฺผคจฺฉา เอเกกสฺส จงฺกมสฺส โกฏิยํ เอเกโก อุทกภริโต กูโป ตสฺส สนฺติเก เอเกโก ผลรุกฺโข โส เอโกว สพฺพผลานิ ผลติ ฯ อิทํ สพฺพํ เทวตานุภาเวน อโหสิ ฯ วิสฺสกมฺโม อสฺสมํ มาเปตฺวา ปณฺณสาลาย ปพฺพชิตปริกฺขาเร ฐเปตฺวา เยเกจิ ปพฺพชิตุกามา อิเม ปริกฺขาเร คณฺหนฺตูติ ชาติหิงฺคุลเกน ภิตฺติยา อกฺขรานิ ลิขิตฺวา อตฺตโน อานุภาเวน เภรวสทฺเท มิคปกฺขิโน ทุทฺทสิเก อมนุสฺเส จ ปฏิกฺกมาเปตฺวา สกฏฺฐานเมว คโต ฯ