อตีเต หิมวนฺตปฺปเทเส เอกํ มหานิโคฺรธํ อุปนิสฺสาย ตโย สหายา วิหรึสุ ติตฺติโร มกฺกโฏ หตฺถีติ ฯ เต อญฺญมญฺญํ อคารวา อปฺปติสฺสา อสภาควุตฺติโน อเหสุํ ฯ อถ เนสํ เอตทโหสิ น ยุตฺตํ อมฺหากํ เอวํ วิหริตุํ ยนฺนูน มยํ โย โน มหลฺลกตโร ตสฺส อภิวาทนาทีนิ กโรนฺตา วิหเรยฺยามาติ ฯ โก ปน โน มหลฺลกตโรติ จินฺเตนฺตา เอกทิวสํ อตฺเถโส อุปาโยติ ตโยปิ ชนา นิโคฺรธมูเล นิสีทิตฺวา ติตฺติโร จ มกฺกโฏ จ หตฺถึ ปุจฺฉึสุ สมฺม หตฺถิ ตฺวํ อิมํ นิโคฺรธรุกฺขํ กีวปฺปมาณกาลโต ปฏฺฐาย ชานาสีติ ฯ โส อาห สมฺมา อหํ ตรุณโปตกกาเล อิมํ นิโคฺรธคจฺฉํ อนฺตรสตฺถีสุ กตฺวา คจฺฉามิ อุตฺตริตฺวา ฐิตกาเล จ ปน เม เอตสฺส อคฺคสาขา นาภึ ฆเฏติ เอวาหํ อิมํ คจฺฉกาลโต ปฏฺฐาย ชานามีติ ฯ ปุน อุโภปิ ชนา ปุริมนเยเนว มกฺกฏํ ปุจฺฉึสุ ฯ โส อาห อหํ สมฺมา มกฺกฏจฺฉาปโก สมาโน ภูมิยํ นิสีทิตฺวา คีวํ อนุกฺขิปิตฺวาว อิมสฺส นิโคฺรธโปตกสฺส องฺกุเร ขาทามิ เอวาหํ อิมํ ขุทฺทกกาลโต ปฏฺฐาย ชานามีติ ฯ อถ อิตเร อุโภปิ ปุริมนเยเนว ติตฺติรํ ปุจฺฉึสุ ฯ โส อาห สมฺมา ปุพฺเพ อสุกสฺมึ นาม ฐาเน มหานิโคฺรธรุกฺโข อโหสิ อหํ ตสฺส ผลานิ ขาทิตฺวา เอตสฺมึ ฐาเน วจฺจํ ปาเตสึ ตโต เอส รุกฺโข ชาโต เอวาหํ อิมํ อชาตกาลโต ปฏฺฐาย ชานามิ ตสฺมา อหํ ตุมฺเหหิ ชาติยา มหลฺลกตโรติ ฯ เอวํ วุตฺเต มกฺกโฏ จ หตฺถี จ ติตฺติรปณฺฑิตํ อาหํสุ สมฺม ตฺวํ อมฺเหหิ มหลฺลกตโร อิโต ปฏฺฐาย มยํ ตว สกฺการครุการมานนวนฺทนปูชนานิ เจว อภิวาทนปจฺจุฏฺฐานอญฺชลิกมฺมสามีจิกมฺมานิ จ กริสฺสาม โอวาเท จ เต ฐสฺสาม ตฺวํ ปน อิโต ปฏฺฐาย อมฺหากํ โอวาทานุสาสนึ ทเทยฺยาสีติ ฯ ตโต ปฏฺฐาย ติตฺติโร เตสํ โอวาทํ อทาสิ สีเลสุ ปติฏฺฐาเปสิ สยมฺปิ สีลานิ สมาทิยิ ฯ เต ตโยปิ ชนา ปญฺจสุ สีเลสุ ปติฏฺฐาย อญฺญมญฺญํ สคารวา สปฺปติสฺสา สภาควุตฺติโน หุตฺวา ชีวิตปริโยสาเน เทวโลกปรายนา อเหสุํ ฯ เตสํ ติณฺณํ สมาทานํ ติตฺติรพฺรหฺมจริยํ นาม อโหสิ ฯ

เต หิ นาม ภิกฺขเว ติรจฺฉานคตา อญฺญมญฺญํ สคารวา สปฺปติสฺสา วิหรึสุ ตุมฺเหปิ เอวํ สฺวากฺขาเต ธมฺมวินเย ปพฺพชิตฺวา กสฺมา อญฺญมญฺญํ อคารวา อปฺปติสฺสา วิหรถ อนุชานามิ ภิกฺขเว อิโต ปฏฺฐาย ตุมฺหากํ ยถาวุฑฺฒํ อภิวาทนํ ปจฺจุฏฺฐานํ อญฺชลิกมฺมํ สามีจิกมฺมํ ยถาวุฑฺฒํ อคฺคาสนํ อคฺโคทกํ อคฺคปิณฺฑํ อิโต ปฏฺฐาย นวกตเรน วุฑฺฒตโร เสนาสเนน น ปฏิพาหิตพฺโพ โย ปฏิพาเหยฺย อาปตฺติ ทุกฺกฏสฺสาติ เอวํ สตฺถา อิมํ ธมฺมเทสนํ อาหริตฺวา อภิสมฺพุทฺโธ หุตฺวา อิมํ คาถมาห