ตตฺถ อชฺเฌนานีติ เวเท ฯ ปฏิคฺคยฺหาติ ปฏิคฺคเหตฺวา อธิสยิตฺวา ฯ อจรินฺติ ปฏิปชฺชึ ฯ อหิตายหนฺติ อตฺถนาสนาย อหํ ฯ โย ปิฏฺฐิมํสิโกติ โย ปุคฺคโล ปเรสํ ปิฏฺฐิมํสขาทโก ปิสุโณ โหติ ฯ อุกฺกจฺจาติ อุกฺกนฺเตตฺวา ฯ

อิทญฺจ ปน วตฺวา ตาปสํ ปุจฺฉิ ตุมฺเห กถํ อิธาคตาติ ฯ ตาปโส สพฺพํ วิตฺถาเรตฺวา กเถสิ ฯ อิทานิ จ ภนฺเต อิเธว วสิสฺสถ คมิสฺสถาติ ฯ น วสิสฺสามิ อสฺสมปทญฺเจว คมิสฺสามีติ ฯ เปโต สาธุ ภนฺเต อหํ โว นิวทฺธํ อมฺพปกฺเกน อุปฏฺฐหิสฺสามีติ วตฺวา อตฺตโน อานุภาเวน อสฺสมปเทเยว โอตาเรตฺวา อนุกฺกณฺฐนฺตา อิเธว วสถาติ ปฏิญฺญํ คเหตฺวา คโต ฯ ตโต ปฏฺฐาย นิวทฺธํ อมฺพปกฺเกน อุปฏฺฐหิ ฯ ตาปโส ตํ ปริภุญฺชนฺโต กสิณปริกมฺมํ กตฺวา ฌานาภิญฺญา นิพฺพตฺเตตฺวา พฺรหฺมโลกปรายโน อโหสิ ฯ

สตฺถา อุปาสกานํ อิทํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน เกจิ โสตาปนฺนา อเหสุํ เกจิ สกทาคามิโน อเหสุํ เกจิ อนาคามิโน อเหสุํ ฯ ตทา เทวธีตา อุปฺปลวณฺณา อโหสิ ฯ ตาปโส ปน อหเมวาติ ฯ

กึฉนฺทชาตกํ นิฏฺฐิตํ ฯ