อตีเต เอกสฺมึ อรญฺญายตเน โพธิสตฺโต อญฺญตรํ ปทุมสรํ นิสฺสาย ฐิเต รุกฺเข รุกฺขเทวตา หุตฺวา นิพฺพตฺติ ฯ ตทา อญฺญตรสฺมึ นาติมหนฺเต สเร นิทาฆสมเย อุทกํ มนฺทํ อโหสิ พหู เจตฺถ มจฺฉา โหนฺติ ฯ อเถโก พโก มจฺเฉ ทิสฺวา เอเกนุปาเยเนว อิเม มจฺเฉ วญฺเจตฺวา ขาทิสฺสามีติ คนฺตฺวา อุทกปริยนฺเต จินฺเตนฺโต นิสีทิ ฯ อถ นํ มจฺฉา ทิสฺวา กึ อยฺย จินฺเตนฺโต นิสินฺโนสีติ ปุจฺฉึสุ ฯ ตุมฺหากํ จินฺเตนฺโต นิสินฺโนมฺหีติ ฯ อมฺหากํ จินฺเตสิ อยฺยาติ ฯ อิมสฺมึ สเร อุทกํ ปริตฺตํ โคจโร จ มนฺโท นิทาโฆ จ มหนฺโต อิทานิเม มจฺฉา กินฺนาม กริสฺสนฺตีติ ตุมฺหากํ จินฺเตนฺโต นิสินฺโนมฺหีติ ฯ อถ กึ กโรม อยฺยาติ ฯ สเจ มยฺหํ วจนํ กเรยฺยาถ อหํ โว เอเกกํ มุขตุณฺฑเกน คเหตฺวา เอกํ ปญฺจวณฺณปทุมสญฺฉนฺนํ มหาสรํ เนตฺวา วิสฺสชฺเชยฺยนฺติ ฯ อยฺย ปฐมกปฺปโต ปฏฺฐาย มจฺฉานํ จินฺตนพโก นาม นตฺถิ ตฺวํ อมฺเหสุ เอเกกํ ขาทิตุกาโมส น มยํ ตุยฺหํ สทฺทหามาติ ฯ นาหํ ขาทิสฺสามิ สเจ ปน สรสฺส อตฺถิภาวํ มยฺหํ น สทฺทหถ เอกํ มจฺฉํ มยา สทฺธึ สรํ ปสฺสิตุํ เปเสถาติ อาห ฯ มจฺฉา ตสฺส สทฺทหิตฺวา อยํ ชเลปิ ถเลปิ สมตฺโถติ เอกํ กาฬมหามจฺฉํ อทํสุ อิมํ คเหตฺวา คจฺฉถาติ ฯ โส ตํ คเหตฺวา เนตฺวา สเร วิสฺสชฺเชตฺวา สพฺพํ สรํ ทสฺเสตฺวา ปุน อาเนตฺวา เตสํ มจฺฉานํ สนฺติเก วิสฺสชฺเชสิ ฯ โส เตสํ มจฺฉานํ สรสฺส สมฺปตฺตึ วณฺเณสิ ฯ เต ตสฺส กถํ สุตฺวา คนฺตุกามา หุตฺวา สาธุ อยฺย อมฺเห คณฺหิตฺวา คจฺฉาหีติ อาหํสุ ฯ พโก ปฐมํ ตํ กาฬมหามจฺฉเมว คเหตฺวา สรตีรํ เนตฺวา สรํ ทสฺเสตฺวา สรตีเร ชาตวรุณรุกฺเข นิลียิตฺวา ตํ วิฏปนฺตเร ปกฺขิปิตฺวา ตุณฺเฑน วิชฺฌนฺโต ชีวิตกฺขยํ ปาเปตฺวา มํสํ ขาทิตฺวา กณฺฏเก รุกฺขมูเล ปาเตตฺวา ปุน คนฺตฺวา วิสฺสฏฺโฐ เม โส มจฺโฉ อญฺโญ อาคจฺฉตูติ เอเตนุปาเยน เอเกกํ คเหตฺวา สพฺเพ มจฺเฉ ขาทิตฺวา ปุน อาคโต เอกํ มจฺฉํปิ นาทฺทส ฯ เอโก ปเนตฺถ กกฺกฏโก อวสิฏฺโฐ ฯ พโก ตมฺปิ ขาทิตุกาโม หุตฺวา โภ กกฺกฏก มยา สพฺเพ เต มจฺฉา เนตฺวา ปทุมสญฺฉนฺเน มหาสเร วิสฺสชฺชิตา เอหิ ตมฺปิ เนสฺสามีติ ฯ มํ คเหตฺวา คจฺฉนฺโต กถํ คณฺหิสฺสสีติ ฯ ฑํสิตฺวา คณฺหิสฺสามีติ ฯ ตฺวํ เอวํ คเหตฺวา คจฺฉนฺโต มํ ปาเตสฺสสิ นาหํ ตยา สทฺธึ คมิสฺสามีติ ฯ มา ภายิ อหํ ตํ สุคหิตํ คเหตฺวา คมิสฺสามีติ ฯ กกฺกฏโก จินฺเตสิ อิมสฺส มจฺเฉ คเหตฺวา สเร วิสฺสชฺชนนฺนาม นตฺถิ สเจ ปน มํ สเร วิสฺสชฺเชสฺสติ อิจฺเจตํ กุสลํ โน เจ วิสฺสชฺเชสฺสติ คีวมสฺส ฉินฺทิตฺวา ชีวิตํ หริสฺสามีติ ฯ อถ นํ เอวมาห สมฺม พก น โข มํ สุคหิตํ คเหตุํ สกฺขิสฺสสิ อมฺหากมฺปน คหณํ สุคหณํ สจาหํ อเฬน ตว คีวํ คเหตุํ ลภิสฺสามิ ตว คีวํ สุคหิตํ กตฺวา ตยา สทฺธึ คมิสฺสามีติ ฯ โส ตํ วญฺเจตุกาโม เอส มนฺติ อชานนฺโต สาธูติ สมฺปฏิจฺฉิ ฯ กกฺกฏโก อตฺตโน อเฬหิ กมฺมารสณฺฑาเสน วิย ตสฺส คีวํ สุคหิตํ กตฺวา อิทานิ คจฺฉาหีติ อาห ฯ โส ตํ เนตฺวา สรํ ทสฺเสตฺวา วรุณรุกฺขาภิมุโข ปายาสิ ฯ กกฺกฏโก อาห มาตุล อยํ สโร เอตฺโต ตฺวํ ปน อิโต เนสีติ ฯ พโก ปิยมาตุโล อหํ น ภคินิปุตฺโตสิ วต เม ตฺวนฺติ วตฺวา ตฺวํ เอส มํ อุกฺขิปิตฺวา วิจรนฺโต มยฺหํ ทาโสติ สญฺญํ กโรสิ มญฺเญ ปสฺเสตํ วรุณรุกฺขมูเล กณฺฏกราสึ ยถา เจเต สพฺเพ มจฺฉา ขาทิตา ตมฺปิ ตเถว ขาทิสฺสามีติ อาห ฯ กกฺกฏโก เอเต มจฺฉา อตฺตโน พาลตาย ตยา ขาทิตา อหมฺปน เต เม ขาทิตุํ น ทสฺสามิ ตญฺเญว ปน วินาสํ ปาเปสฺสามิ ตฺวํ หิ พาลตาย มยา วญฺจิตภาวํ น ชานาสิ มรนฺตา อุโภปิ มริสฺสาม เอส เต สีสํ ฉินฺทิตฺวา ภูมิยํ ขิปิสฺสามีติ วตฺวา สณฺฑาเสน วิย อเฬน ตสฺส คีวํ นิปฺปีเฬสิ ฯ โส วิวเฏน มุเขน อกฺขีหิ อสฺสุนา ปคฺฆรนฺเตน มรณภยตชฺชิโต สามิ อหํ ตํ น ขาทิสฺสามิ ชีวิตํ เม เทหีติ อาห ฯ ยทิ เอวํ โอตริตฺวา มํ สรสฺมึ วิสฺสชฺเชหีติ ฯ โส นิวตฺติตฺวา สรเมว โอตริตฺวา กกฺกฏกํ สรปริยนฺเต ปงฺกปิฏฺเฐ ฐเปสิ ฯ กกฺกฏโก กตฺตริกาย กุมุทนาฬํ กปฺเปนฺโต วิย ตสฺส คีวํ กปฺเปตฺวา อุทกํ ปาวิสิ ฯ ตํ อจฺฉริยํ ทิสฺวา วรุณรุกฺเข อธิวตฺถา เทวตา วนํ อุนฺนาทยมานา สาธุการํ ททมานา มธุรสฺสเรน อิมํ คาถมาห