มญฺเญ โสวณฺณโย ราสิ โสวณฺณมาลา จ นนฺทโก

ยตฺถ ทาโส อามชาโต ฐิโต ถุลฺลานิ คชฺชตีติ ฯ

ตตฺถ มญฺเญติ เอวํ อหํ ชานามิ ฯ โสวณฺณโยติ สุนฺทโร วณฺโณ เอเตสนฺติ สุวณฺณานิ ฯ กานิ ตานิ ฯ รชตมณิกาญฺจนปวาฬาทีนิ รตนานิ ฯ อิมสฺมึ หิ ฐาเน สพฺพาเนตานิ สุวณฺณานีติ อธิปฺเปตานิ ฯ เตสํ ราสิ โสวณฺณโย ราสิ ฯ โสวณฺณมาลา จาติ ตุยฺหํ ปิตุ สนฺตกา สุวณฺณมาลาปิ จ เอตฺเถวาติ มญฺญามิ ฯ นนฺทโก ยตฺถ ทาโสติ ยสฺมึ ฐาเน ฐิโต นนฺทโก ทาโส ฯ อามชาโตติ อาม อหํ โว ทาสีติ เอวํ ทาสพฺยํ อุปคตาย อามทาสีสงฺขาตาย ทาสิยา ปุตฺโต ฯ ฐิโต ถุลฺลานิ คชฺชตีติ โส ยสฺมึ ฐาเน ฐิโต ถุลฺลานิ ผรุสวจนานิ วทติ ตตฺเถว เต กุลธนํ เอวมหนฺตํ มญฺญามีติ โพธิสตฺโต กุมารสฺส ธนคหณุปายํ อาจิกฺขิ ฯ

กุมาโร โพธิสตฺตํ วนฺทิตฺวา ฆรํ คนฺตฺวา นนฺทํ อาทาย นิธิฏฺฐานํ คนฺตฺวา ยถานุสิฏฺฐํ ปฏิปชฺชิตฺวา ตํ ธนํ อาหริตฺวา กุฏุมฺพํ สณฺฐเปตฺวา โพธิสตฺตสฺส โอวาเท ฐตฺวา ทานาทีนิ ปุญฺญานิ กตฺวา ชีวิตปริโยสาเน ยถากมฺมํ คโต ฯ