วนฺทิตฺวา มาตุ ปิตุ จ ปาเทติ ฯ

ตตฺถ ปาเทติ ปาเท วนฺทิตฺวา นิกฺขมนฺโตติ อตฺโถ ฯ

อถสฺส มาตาปิตโรปิ ภคินีปิ ภริยาปิ อมจฺจปริชเนหิ สทฺธึเยว นิกฺขมึสุ ฯ โส นครา นิกฺขมิตฺวา ปิตรํ มคฺคํ ปุจฺฉิตฺวา สุฏฺฐุ ววตฺถเปตฺวา มาตาปิตโร วนฺทิตฺวา เสสานํ โอวาทํ ทตฺวา อจฺฉมฺภีโต เกสรสีโห วิย มคฺคํ อารุยฺห ยกฺขาวาสํ ปายาสิ ฯ ตํ คจฺฉนฺตํ ทิสฺวา มาตา สกภาเวน สณฺฐาเรตุํ อสกฺโกนฺตี ปฐวิยํ ปตติ ฯ ปิตา พาหา ปคฺคยฺห มหนฺเตน สทฺเทน กนฺทติ ฯ

ตมตฺถํ ปกาเสนฺโต สตฺถา อุปฑฺฒคาถํ อาห