๒ กโปตชาตกํ

โย อตฺถกามสฺสาติ อิทํ สตฺถา เชตวเน วิหรนฺโต อญฺญตรํ โลลภิกฺขุํ อารพฺภ กเถสิ ฯ

ตสฺส โลลภาโว นวนิปาเต กากชาตเก อาวิภวิสฺสติ ฯ ตทา ปน ตํ ภิกฺขุํ อยํ ภนฺเต ภิกฺขุ โลโลติ สตฺถุ อาโรเจสุํ ฯ อถ นํ สตฺถา สจฺจํ กิร ตฺวํ ภิกฺขุ โลโลติ ปุจฺฉิ ฯ อาม ภนฺเตติ ฯ สตฺถา ปุพฺเพปิ ตฺวํ ภิกฺขุ โลโล โลลการณา ชีวิตกฺขยํ ปตฺโต ปณฺฑิตาปิ ตํ นิสฺสาย อตฺตโน วสนฏฺฐานา ปริหีนาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ปาราวตโยนิยํ นิพฺพตฺติ ฯ ตทา พาราณสีวาสิโน ปุญฺญกามตาย ตสฺมึ ตสฺมึ ฐาเน สกุณานํ สุขวสนตฺถาย ถุสปจฺฉิโย โอลมฺพนฺติ ฯ ตทา พาราณสีเสฏฺฐิโนปิ ภตฺตการโก อนฺโตมหานเส เอวํ ถุสปจฺฉึ โอลมฺเพตฺวา ฐเปสิ ฯ โพธิสตฺโต ตตฺถ วาสํ กปฺเปสิ ฯ โส ปาโตว นิกฺขมิตฺวา โคจเร จริตฺวา สายํ อาคนฺตฺวา ตตฺถ วสนฺโต กาลํ เขเปสิ ฯ อเถกทิวสํ เอโก กาโก มหานสมตฺถเกน คจฺฉนฺโต อมฺพิลานมฺพิลมจฺฉมํสานํ ธูปนวาสํ ฆายิตฺวา โลภํ อุปฺปาเทตฺวา กึ นุ โข นิสฺสาย อิมํ มจฺฉมํสํ ลภิสฺสามีติ อวิทูเร นิสีทิตฺวา ปริคฺคณฺหนฺโต สายํ โพธิสตฺตํ อาคนฺตฺวา มหานสํ ปวิสนฺตํ ทิสฺวา อิมํ ปาราวตํ นิสฺสาย มํสํ ลภิสฺสามีติ ปุนทิวเส ปาโตว อาคนฺตฺวา โพธิสตฺตสฺส นิกฺขมิตฺวา โคจรคหณตฺถาย คมนกาเล ปิฏฺฐิโต ปิฏฺฐิโต อคมาสิ ฯ อถ นํ โพธิสตฺโต กสฺมา ตฺวํ สมฺม อมฺเหหิ สทฺธึ จรสีติ อาห ฯ สามิ ตุมฺหากํ กิริยา มยฺหํ รุจฺจติ อิโต ปฏฺฐาย ตุมฺเห อุปฏฺฐหิสฺสามีติ ฯ สมฺม ตุมฺเห อญฺญโคจรา มยํ อญฺญโคจรา ตุมฺเหหิ ตุมฺหากํ อุปฏฺฐานํ ทุกฺกรนฺติ ฯ สามิ ตุมฺหากํ โคจรํ คตกาเล อหมฺปิ โคจรํ คเหตฺวา ตุมฺเหหิ สทฺธึเยว คมิสฺสามีติ ฯ สาธุ เกวลํ เต อปฺปมตฺตเกน ภวิตพฺพนฺติ เอวํ โพธิสตฺโต กากํ โอวทิตฺวา โคจเร จรนฺโต ติณพีชาทีนิ ขาทติ ฯ โพธิสตฺตสฺส ปน โคจรคหณกาเล กาโก คนฺตฺวา โคมยปิณฺฑํ อปเนตฺวา ปาณเก ขาทิตฺวา อุทรํ ปูเรตฺวา โพธิสสฺตสฺส สนฺติกํ อาคนฺตฺวา สามิ ตุมฺเห อติเวลํ จรถ อติพหุภกฺเขน นาม ภวิตุํ น วฏฺฏตีติ วตฺวา โพธิสตฺเตน โคจรํ คเหตฺวา สายํ อาคจฺฉนฺเตน สทฺธึเยว มหานสํ ปาวิสิ ฯ ภตฺตการโก อมฺหากํ กโปโต อญฺญํปิ คเหตฺวา อาคโตติ วตฺวา กากสฺสาปิ ปจฺฉึ ฐเปสิ ฯ ตโต ปฏฺฐาย เทฺว ชนา วสนฺติ ฯ