อเถกทิวสํ เสฏฺฐิสฺส พหุํ มจฺฉมํสํ อาหรึสุ ฯ ตํ อาทาย ภตฺตการโก มหานเส ตตฺถ ตตฺถ โอลคฺเคสิ ฯ กาโก ตํ ทิสฺวา โลภํ อุปฺปาเทตฺวา เสฺว โคจรภูมึ อคนฺตฺวา มยา อิทเมว ขาทิตพฺพนฺติ รตฺตึ นิฏฐุนนฺโต นิปชฺชิ ฯ ปุนทิวเส โพธิสตฺโต โคจราย คจฺฉนฺโต เอหิ สมฺม กากาติ อาห ฯ สามิ ตุมฺเห คจฺฉถ มยฺหํ กุจฺฉิโรโค อตฺถีติ ฯ สมฺม กากานํ กุจฺฉิโรโค นาม น กทาจิ ภูตปุพฺโพ รตฺตึ ตีสุ ยาเมสุ เอเกกสฺมึ ยาเม มุจฺฉิตา โหนฺติ ทีปวฏฺฏิคิลิตกาเล ปน เตสํ มุหุตฺตํ ติตฺติ โหติ ตฺวํ อิมํ มจฺฉมํสํ ขาทิตุกาโม ภวิสฺสสิ เอหิ มนุสฺสปริโภโค นาม ตุมฺหากํ อปริภุญฺชิโย มา เอวรูปํ อกาสิ มยา สทฺธึเยว โคจราย คจฺฉาหีติ ฯ น สกฺโกมิ สามีติ ฯ เตนหิ ปญฺญายิสฺสสิ สเกน กมฺเมน โลภวสํ อคนฺตฺวา อปฺปมตฺโต โหหีติ ตํ โอวทิตฺวา โพธิสตฺโต โคจราย คโต ฯ ภตฺตการโก นานปฺปการํ มจฺฉมํสวิกตึ สมฺปาเทตฺวา อุสุมํ นิพฺพาปนตฺถํ ภาชนานิ โถกํ วิวริตฺวา รสปริสฺสาวนกโรฏึ ภาชนมตฺถเก ฐเปตฺวา พหิ นิกฺขมิตฺวา เสทํ ปุญฺฉมาโน อฏฺฐาสิ ฯ ตสฺมึ ขเณ กาโก ปจฺฉิโต สีสํ อุกฺขิปิตฺวา ภตฺตเคหํ โอโลเกนฺโต ตสฺส นิกฺขนฺตภาวํ ญตฺวา อยนฺทานิ มยฺหํ มโนรถํ ปูเรตฺวา มํสํ ขาทิตุกาโม กินฺนุ โข มหามํสํ ขาทามิ อุทาหุ จุณฺณิกํ มํสนฺติ จินฺเตตฺวา จุณฺณิกมํเสน นาม ขิปฺปํ กุจฺฉึ ปูเรตุํ น สกฺกา มหนฺตํ มํสขณฺฑํ อาหริตฺวา ปจฺฉิยํ นิกฺขิปิตฺวา ขาทมาโน นิปชฺชิสามีติ ปจฺฉิโต อุปฺปติตฺวา รสกโรฏิยํ นิลียิ ฯ โส กิรีติ สทฺทมกาสิ ฯ ภตฺตการโก ตํ สทฺทํ สุตฺวา กินฺนุ โข เอตนฺติ ปวิฏฺโฐ กากํ ทิสฺวา อยํ ทุฏฺฐกาโก มหาเสฏฺฐิโน ปกฺกมํสํ ขาทิตุกาโม อหํ โข ปน เสฏฺฐึ นิสฺสาย ชีวามิ น อิมํ พาลํ กึ เม อิมินาติ ทฺวารํ ปิธาย กากํ คเหตฺวา สกลสรีเร ปตฺตานิ ลุญฺจิตฺวา อลฺลสิงฺคิเวรํ โลณชีรกาย โกฏฺเฏตฺวา อมฺพิลตกฺเกน อาโลเฬตฺวา เตนสฺส สกลสรีรํ มกฺเขตฺวา ตํ กากํ ปจฺฉิยํ ขิปิ ฯ โส อธิมตฺตาย เวทนายาภิภูโต นิฏฺฐุนนฺโต นิปชฺชิ ฯ โพธิสตฺโต สายํ อาคนฺตฺวา ตํ พฺยสนปฺปตฺตํ ทิสฺวา โลลกาก มม วจนํ อกตฺวา ตว โลภํ นิสฺสาย มหาทุกฺขํ ปตฺโตสีติ วตฺวา อิมํ คาถมาห

โย อตฺถกามสฺส หิตานุกมฺปิโน

โอวชฺชมาโน น กโรติ สาสนํ

กโปตกสฺส วจนํ อกตฺวา