อมิตฺตหตฺถตฺถคโตว เสตีติ ฯ

ตตฺถ กโปตกสฺส วจนํ อกตฺวาติ ปาราวตสฺส หิตานุสาสนึ วจนํ อกตฺวา ฯ อมิตฺตหตฺถตฺถคโตว เสตีติ อมิตฺตานํ อนตฺถการกานํ ทุกฺขุปฺปาทกปุคฺคลานํ หตฺถปถํ คโต อยํ กาโก วิย โส ปุคฺคโล มหนฺตํ พฺยสนํ ปตฺวา อนุโสจมาโน เสตีติ ฯ

โพธิสตฺโต อิมํ คาถํ วตฺวา อิทานิ มยาปิ อิมสฺมึ ฐาเน น สกฺกา วสิตุนฺติ อญฺญตฺถ คโต ฯ กาโกปิ ตตฺเถว ชีวิตกฺขยํ ปตฺโต ฯ อถ นํ ภตฺตการโก สทฺธึ ปจฺฉิยา คเหตฺวา สงฺการฏฺฐาเน ฉฑฺเฑสิ ฯ

สตฺถาปิ น ตฺวํ ภิกฺขุ อิทาเนว โลโล ปุพฺเพปิ โลโลเยว ตญฺจ ปน เต โลลํ นิสฺสาย ปณฺฑิตาปิ สกมฺหา อาวาสา ปริหีนาติ อิมํ ธมฺมเทสนํ อาหริตฺวา สจฺจานิ ปกาเสสิ ฯ สจฺจปริโยสาเน โส ภิกฺขุ อนาคามิผลํ ปตฺโต ฯ สตฺถา อนุสนฺธึ ฆเฏตฺวา ชาตกํ สโมธาเนสิ ตทา กาโก โลลภิกฺขุ อโหสิ ปาราวโต อหเมวาติ ฯ