อาสิตฺตสตฺโต นิหโต ปฐพฺยา

อินฺทสฺส วากฺเยน หิ สํวโร หโตติ ฯ

ตตฺถ ตสฺมาติ ยสฺมา มิตฺตทุพฺภิกมฺมสฺส ผรุโส วิปาโก ตสฺมา ฯ อาสิตฺตสตฺโตติ อาสิตฺตวิเสน สตฺโต ฯ อินฺทสฺสาติ นาคินฺทสฺส วากฺเยน ฯ สํวโรติ อหํ สํวเร ฐิโตสฺมีติ ปฏิญฺญาย เอว ปญฺญาโต อาชีวโก หโตติ ฯ

สตฺถา อิมํ ธมฺมเทสนํ อาหริตฺวา น ภิกฺขเว อิทาเนว ปุพฺเพปิ เทวทตฺโต มุสาวาทํ กตฺวา ปฐวึ ปวิฏฺโฐติ วตฺวา ชาตกํ สโมธาเนสิ ตทา อเจโล เทวทตฺโต อโหสิ นาคราชา สารีปุตฺโต สุปณฺณราชา ปน อหเมวาติ ฯ