ตตฺถ เวเทหปุตฺโตติ เวเทหราชปิยปุตฺโต ฯ โรคสมฺมตฺตนฺติ โรคปีฬิตํ ฯ อุปฏฺฐหินฺติ อุปฏฺฐหามิ ปฏิชคฺคามิ ฯ อุปฏฺฐิตาติปิ ปาโฐ ฯ วนมุญฺฉายาติ วนํ อุจฺจินิตฺวา อุญฺฉาจริยํ จริตฺวา ฯ มธุมํสนฺติ นิมฺมกฺขิกํ มธุญฺจ มิคาวิลํ มํสญฺจ สีหพฺยคฺฆมิเคหิ ขาทิตมํสโต อติริตฺตโกฏฺฐาสํ ฯ ตํภกฺโขติ ยํ อหํ อาหรามิ ตํภกฺโขว โส มม สามิโก ฯ ตสฺส นูนชฺชาติ ตสฺส มญฺเญว อชฺช อาหารํ อลภมานสฺส สรีรํ อาตเป ปกฺขิตฺตปทุมํ วิย ฯ นาธตีติ อุปตปฺปติ มิลายติ ฯ

ตโต ปรํ ทานวสฺส จ ตสฺสา จ วจนปฏิวจนคาถาโย โหนฺติ

กึ วเน ราชปุตฺเตน อาตุเรน กริสฺสสิ

สมฺพุเล ปริจิณฺเณน อหํ ภตฺตา ภวามิ เต ฯ