เอวํ เวสฺสนฺตรสกุเณน เอกาย คาถาย รญฺโญ ปมาทํ โจเทตฺวา เอกาทสหิ คาถาหิ ธมฺเม กถิเต พุทฺธลีลาย ปญฺโห กถิโตติ มหาชโน อจฺฉริยพฺภูตจิตฺตชาโต สาธุการสตานิ ปวตฺเตสิ ฯ ราชา โสมนสฺสชาโต อมจฺเจ อามนฺเตตฺวา โภนฺโต อมจฺจา มม ปุตฺเตน เวสฺสนฺตเรน เอวํ กเถนฺเตน เกน กตฺตพฺพํ กิจฺจํ กตนฺติ ฯ มหาเสนคุตฺเตน เทวาติ ฯ เตนหิสฺส มหาเสนคุตฺตฏฺฐานํ ทมฺมีติ เวสฺสนฺตรํ ฐานนฺตเร ฐเปสิ ฯ โส ตโต ปฏฺฐาย มหาเสนคุตฺตฏฺฐาเน ฐิโต ปิตุ กมฺมํ อกาสีติ ฯ เวสฺสนฺตรปญฺโห นิฏฺฐิโต ฯ

ปุน ราชา กติปาหจฺจเยน ปุริมนเยเนว กุณฺฑลินิยา สนฺติกํ ทูตํ ปาเหตฺวา สตฺตเม ทิวเส ตตฺถ คนฺตฺวา ปจฺจาคนฺตฺวา ตตฺเถว มณฺฑปมชฺเฌ นิสีทิตฺวา กุณฺฑลินี อาหราเปตฺวา สุวณฺณปีเฐ นิสินฺนํ ราชธมฺมํ ปุจฺฉนฺโต คาถมาห

สกฺขิ ตุวํ กุณฺฑลินิ มญฺญสิ ขตฺตพนฺธุนี

รชฺชํ กาเรตุกาเมน กึสุ กิจฺจํ กตํ วรนฺติ ฯ