ตตฺถ ปุรินฺทโทติ อาทีนิ สกฺกสฺเสว คุณโต นามานิ ฯ โส หิ ปุเร ทานํ ทินฺนตฺตา ปุรินฺทโท ภูเตสุ เชฏฺฐกตฺตา ภูตปติ ปริวารสมฺปทาย ยสสฺสี ปรมิสฺสรตาย เทวานมินฺโท สตฺตนฺนํ วตฺตปทานํ สุฏฺฐุ กตตฺตา สกฺโก ปุริมชาติวเสน มฆวา สุชาตาย อสุรกญฺญาย ปติภาเวน สุชมฺปติ เทวานํ มนรญฺชตาย เทวราชา ฯ โกเนวาติ โก นุ เอว ฯ นิปุเณติ สณฺเห สุขุมปญฺเห ฯ รญฺญนฺติ ราชูนํ ฯ อิเมสํ ปน จตุนฺนํ ราชูนํ มนํ คเหตฺวา โก อิเมสํ ปณฺฑิตานํ อิสีนํ ปญฺเห กเถสฺสติ ปญฺหํ เตสํ กเถตุํ สมตฺถํ ชานถาติ วทติ ฯ

ตํ สุตฺวา อิสิคโณ มาริส อนุสิสฺส ตฺวํ ปฐวิยํ ฐตฺวา ปฐวึ อปสฺสนฺโต วิย กเถสิ ฐเปตฺวา สรภงฺคสตฺถารํ โก อญฺโญ เตสํ ปญฺหํ กเถตุํ สมตฺโถติ วตฺวา คาถมาห

อยํ อิสิ สรภงฺโค ยสสฺสี

ยโต ชาโต วิรโต เมถุนสฺมา