ลเภถ ปุพฺพาปริยํ วิเสสํ

ลทฺธาน ปุพฺพาปริยํ วิเสสํ

อทสฺสนํ มจฺจุราชสฺส คจฺเฉติ ฯ

ตตฺถ ปรมตฺถสญฺหิตาติ อนิจฺจาทิทีปเนน นิพฺพานนิสฺสิตา คาถา ฯ อิมาติ อิทํ สตฺถา สรภงฺคสตฺถุโน นิพฺพานทายกํ สุภาสิตํ วณฺเณนฺโต อาห ฯ ตตฺถ อตฺถวตีติ นิพฺพานทายกฏฺเฐน ปรมตฺถนิสฺสิตา ฯ สุพฺยญฺชนาติ ปริสุทฺธพฺยญฺชนา ฯ สุภาสิตาติ สุโสตพฺพํ กตฺวา ภาสิตา สุกถิตา ฯ อฏฺฐิกตฺวาติ อตฺตโน อตฺถิกภาวํ กตฺวา อตฺถิโก หุตฺวา สกฺกจฺจํ สุเณยฺย ฯ ปุพฺพาปริยนฺติ ปฐมชฺฌานํ ปุพฺพวิเสโส ทุติยชฺฌานํ อปรวิเสโส เอวํ อฏฺฐสมาปตฺติวเสน จตุมคฺควเสน ปุพฺพาปรภาเวน ฐิตํ วิเสสํ ฯ อทสฺสนนฺติ ปริโยสาเน จ อปรวิเสสํ อรหตฺตํ ลภิตฺวา นิพฺพานํ ปาปุเณยฺย ฯ นิพฺพานปฺปตฺโต หิ ปุคฺคโล มจฺจุราชสฺส อทสฺสนํ คโต นาม โหตีติ ฯ