มิสฺเส เทวา ตํ ยาจนฺติ ตาวตึสา สอินฺทกา

อิสิปโลภิเก คจฺฉ อิสิสิงฺคํ อลมฺพุเสติ ฯ

ตตฺถ มิสฺเสติ ตํ อาลปติ ฯ อิทญฺจ ตสฺสา นามํ สพฺพา ปนิตฺถิโย ปุริเส กิเลสมิสฺสเนน มิสฺสนโต มิสฺสาติ วุจฺจนฺติ ฯ เตน สาธารเณน คุณนาเมนาลปนฺโต เอวมาห ฯ อิสิปโลภิเกติ อิสีนํ ปโลภนสมตฺเถ ฯ อิสิสิงฺคนฺติ ตสฺส กิร มตฺถเก มิคสิงฺคากาเรน เทฺว จูฬา อุฏฺฐหึสุ ตสฺมา เอวํ วุจฺจติ ฯ

อิติ สกฺโก คจฺฉ อิสิสิงฺคํ อุปสงฺกมิตฺวา อตฺตโน วสํ อาเนตฺวา สีลมสฺส ภินฺทาติ อลมฺพุสํ อาณาเปสิ ฯ