นกฺขตฺตํ ปฏิมาเนนฺตํ อตฺโถ พาลํ อุปจฺจคา

อตฺโถ อตฺถสฺส นกฺขตฺตํ กึ กริสฺสนฺติ ตารกาติ ฯ

ตตฺถ ปฏิมาเนนฺตนฺติ โอโลเกนฺตํ อิทานิ นกฺขตฺตํ ภวิสฺสติ อิทานิ ภวิสฺสตีติ อาคมยมานนฺติ อตฺโถ ฯ อตฺโถ พาลํ อุปจฺจคาติ เอตํ นครวาสิกํ พาลํ ทาริกปฏิลาภสงฺขาโต อตฺโถ อติกฺกนฺโต ฯ อตฺโถ อตฺถสฺส นกฺขตฺตนฺติ ยํ อตฺถํ ปริเยสนฺโต จรติ โส ปฏิลทฺโธ อตฺโถว อตฺถสฺส นกฺขตฺตนฺนาม ฯ กึ กริสฺสนฺติ ตารกาติ อิตเร ปน อากาเส ตารกา กึ กริสฺสนฺติ กตรํ อตฺถํ สาเธสฺสนฺตีติ อตฺโถ ฯ

นครวาสิโน กลหํ กตฺวา ทาริกํ อลภิตฺวาว อคมํสุ ฯ