ทุมฺเมธานํ สหสฺเสน ยญฺโญ เม อุปยาจิโต

อิทานิ โขหํ ยชิสฺสามิ พหุ อธมฺมิโก ชโนติ ฯ

ตตฺถ ทุมฺเมธานํ สหสฺเสนาติ อิทํ กมฺมํ กาตุํ วฏฺฏติ อิทํ น วฏฺฏตีติ อชานนภาเวน ทสสุ วา ปน อกุสลกมฺมปเถสุ สมาทาย วตฺตนภาเวน ทุมฺเมธา เอเตสนฺติ ทุมฺเมธา เตสํ ทุมฺเมธานํ นิปฺปญฺญานํ พาลปุคฺคลานํ คณิตฺวา คหิเตน สหสฺเสน ฯ ยญฺโญ เม อุปยาจิโตติ มยา เทวตํ อุปสงฺกมิตฺวา เอวํ ยชิสฺสามีติ ยญฺโญ ยาจิโต ฯ อิทานิ โขหํ ยชิสฺสามีติ โส อหํ อิมินา อายาจเนน รชฺชสฺส ปฏิลทฺธตฺตา อิทานิ ยชิสฺสามิ ฯ กึการณา ฯ อิทานิ หิ พหุ อธมฺมิโก ชโน ตสฺมา อิทาเนว นํ คเหตฺวา พลิกมฺมํ กริสฺสามีติ ฯ

อมจฺจา โพธิสตฺตสฺส วจนํ สุตฺวา สาธุ เทวาติ ทฺวาทสโยชนิเก พาราณสีนคเร เภริญฺจาราเปสุํ ฯ เภริยา อาณํ สุตฺวา เอกมฺปิ ทุสฺสีลกมฺมํ สมาทาย ฐิโต เอกปุริโสปิ นาโหสิ ฯ อิติ ยาว โพธิสตฺโต รชฺชํ กาเรสิ ตาว เอกปุคฺคโลปิ ปญฺจสุ วา ทสสุ วา ทุสฺสีลกมฺเมสุ เอกมฺปิ กมฺมํ กโรนฺโต น ปญฺญายิตฺถ ฯ เอวํ โพธิสตฺโต เอกปุคฺคลมฺปิ อกิลมนฺโต สกลรฏฺฐวาสิโน สีลํ รกฺขาเปตฺวา สยมฺปิ ทานาทีนิ ปุญฺญานิ กริตฺวา ชีวิตปริโยสาเน อตฺตโน ปริสํ อาทาย เทวนครํ ปูเรนฺโต อคมาสิ ฯ