๕. ปญฺจาวุธชาตกํ

โย อลีเนน จิตฺเตนาติ อิทํ สตฺถา เชตวเน วิหรนฺโต เอกํ โอสฺสฏฺฐวิริยํ ภิกฺขุํ อารพฺภ กเถสิ ฯ

ตํ ภิกฺขุํ สตฺถา อามนฺเตตฺวา สจฺจํ กิร ตฺวํ ภิกฺขุ โอสฺสฏฺฐวิริโยติ ปุจฺฉิตฺวา สจฺจํ ภควาติ วุตฺเต ภิกฺขุ ปุพฺเพปิ ปณฺฑิตา วิริยํ กาตุํ ยุตฺตฏฺฐาเน วิริยํ กตฺวา รชฺชสมฺปตฺตึ ปาปุณึสูติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส รญฺโญ อคฺคมเหสิยา กุจฺฉิสฺมึ นิพฺพตฺติ ฯ ตสฺส นามคหณทิวเส อฏฺฐสเต พฺราหฺมเณ สพฺพกาเมหิ สนฺตปฺเปตฺวา ลกฺขณานิ ปฏิปุจฺฉึสุ ฯ ลกฺขณกุสลา พฺราหฺมณา ลกฺขณสมฺปตฺตึ ทิสฺวา ปุญฺญสมฺปนฺโน มหาราช กุมาโร ตุมฺหากํ อจฺจเยน รชฺชํ ปาปุณิสฺสติ ปญฺจาวุธกมฺเมน ปญฺญาโต ปากโฏ สกลชมฺพูทีเป อคฺคปุริโส ภวิสฺสตีติ พฺยากรึสุ ฯ พฺราหฺมณานํ วจนํ สุตฺวา กุมารสฺส นามํ คณฺหนฺตา ปญฺจาวุธกุมาโรติ นามํ อกํสุ ฯ อถ นํ วิญฺญุตํ ปตฺวา โสฬสวสฺสปเทเส ฐิตํ ราชา อามนฺเตตฺวา ตาต สิปฺปํ อุคฺคณฺหาหีติ อาห ฯ กสฺส สนฺติเก คณฺหามิ เทวาติ ฯ คจฺฉ ตาต คนฺธารรฏฺเฐ ตกฺกสิลานคเร ทิสาปาโมกฺขสฺส อาจริยสฺส สนฺติเก สิปฺปํ อุคฺคณฺห อิทญฺจสฺส อาจริยภาคํ ทเทยฺยาสีติ สหสฺสํ ทตฺวา อุยฺโยเชสิ ฯ โส ตตฺถ คนฺตฺวา สิปฺปํ สิกฺขิตฺวา อาจริเยน ทินฺนํ ปญฺจาวุธํ คเหตฺวา อาจริยํ วนฺทิตฺวา ตกฺกสิลานครโต นิกฺขมิตฺวา สนฺนทฺธปญฺจาวุโธ พาราณสีมคฺคํ ปฏิปชฺชิ ฯ โส อนฺตรามคฺเค สิเลสโลมยกฺเขน นาม อธิฏฺฐิตํ เอกํ อฏวึ ปาปุณิ ฯ อถ นํ อฏวีมุเข มนุสฺสา ทิสฺวา โภ มาณว มา อิมํ อฏวึ ปาวิสิ สิเลสโลมยกฺโข นาเมตฺถ อตฺถิ โส ทิฏฺฐทิฏฺฐมนุสฺเส ชีวิตกฺขยํ ปาเปตีติ นิวารยึสุ ฯ