ตตฺรายํ ปิณฺฑตฺโถ โย ปุริโส อลีเนน อสงฺกุจิเตน จิตฺเตน ปกติยา อลีนมโน อลีนชฺฌาสโยว หุตฺวา อนวชฺชฏฺเฐน กุสลํ สตฺตตฺตึสโพธิปกฺขิยเภทํ ธมฺมํ ภาเวติ วฑฺเฒติ วิสาเลน จิตฺเตน วิปสฺสนํ อนุยุญฺชติ จตูหิ โยเคหิ เขมสฺส นิพฺพานสฺส ปตฺติยา โส เอวํ สพฺพสงฺขาเรสุ อนิจฺจํ ทุกฺขํ อนตฺตาติ ติลกฺขณํ อาโรเปตฺวา ตรุณวิปสฺสนโต ปฏฺฐาย อุปฺปนฺเน โพธิปกฺขิยธมฺเม ภาเวนฺโต อนุปุพฺเพน เอกสํโยชนมฺปิ อนวเสเสตฺวา สพฺเพสํ สํโยชนานํ ขยกรสฺส จตุตฺถมคฺคสฺส ปริโยสาเน อุปฺปนฺนตฺตา สพฺพสํโยชนกฺขโยติ สงฺขฺยํ คตํ อรหตฺตํ ปาปุเณยฺยาติ ฯ

เอวํ สตฺถา อรหตฺเตน ธมฺมเทสนาย กูฏํ คเหตฺวา มตฺถเก จตฺตาริ สจฺจานิ ปกาเสสิ ฯ สจฺจปริโยสาเน โส ภิกฺขุ อรหตฺตํ ปาปุณิ ฯ สตฺถาปิ อนุสนฺธึ ฆเฏตฺวา ชาตกํ สโมธาเนสิ ตทา ยกฺโข องฺคุลิมาโล อโหสิ ปญฺจาวุธกุมาโร ปน อหเมวาติ ฯ

ปญฺจาวุธชาตกํ ปญฺจมํ ฯ