โพธิสตฺโต รญฺโญ คตกาลโต ปฏฺฐาย อตฺตโน รุจนเวลาย เคหํ คจฺฉติ ฯ อเถกทิวสํ มุทุลกฺขณา โพธิสตฺตสฺส อาหารํ สมฺปาเทตฺวา อชฺช อยฺโย จิรายตีติ คนฺโธทเกน นฺหายิตฺวา สพฺพาลงฺการปฏิมณฺฑิตา มหาตเล จูฬสยนํ ปญฺญเปตฺวา โพธิสตฺตสฺส อาคมนํ โอโลกยมานา นิปชฺชิ ฯ โพธิสตฺโตปิ อตฺตโน เวลํ สลฺลกฺเขตฺวา ฌานา วุฏฺฐาย อากาเสเนว ราชนิเวสนํ อคมาสิ ฯ มุทุลกฺขณา วากจีรสทฺทํ สุตฺวา อยฺโย อาคโตติ เวเคน อุฏฺฐหิ ฯ ตสฺสา เวเคน อุฏฺฐหนฺติยา มฏฺฐสาฏโก ภสฺสิ ฯ ตาปโส สีหปญฺชเรน ปวิสนฺโต เทวิยา วิสภาครูปารมฺมณํ ทิสฺวา อินฺทฺริยานิ ภินฺทิตฺวา สุภวเสน โอโลเกสิ ฯ อถสฺส อพฺภนฺตเร กิเลโส จลิ วาสิยา ปหฏขีรรุกฺโข วิย อโหสิ ฯ ตาวเทวสฺส ฌานํ อนฺตรธายิ ฯ ฉินฺนปกฺโข กาโก วิย อโหสิ ฯ โส ฐิตโกว อาหารํ คเหตฺวา อภุญฺชิตฺวา กิเลเสหิ กมฺปิโต ปาสาทา โอรุยฺห อุยฺยานํ คนฺตฺวา ปณฺณสาลํ ปวิสิตฺวา ผลกตฺถรกสยนสฺส เหฏฺฐา อาหารํ ฐเปตฺวา วิสภาคารมฺมณพนฺโธ กิเลสคฺคินา ทยฺหมาโน นิราหารตาย สุสฺสมาโน สตฺต ทิวสานิ ผลกตฺถรเก นิปชฺชิ ฯ

สตฺตเม ทิวเส ราชา ปจฺจนฺตํ วูปสเมตฺวา อาคโต นครํ ปทกฺขิณํ กตฺวา นิเวสนํ อคนฺตฺวาว อยฺยํ ปสฺสิสฺสามีติ อุยฺยานํ คนฺตฺวา ปณฺณสาลํ ปวิสิตฺวา ตํ นิปนฺนกํ ทิสฺวา เอกํ อผาสุกํ ชาตํ มญฺเญติ ปณฺณสาลํ โสธาเปตฺวา ปาเท ปริมชฺชนฺโต กึ อยฺยสฺส อผาสุกนฺติ ปุจฺฉิ ฯ มหาราช อญฺญํ เม อผาสุกํ นตฺถิ กิเลสวเสน ปนมฺหิ ปฏิพทฺธจิตฺโต ชาโตติ ฯ กหํ ปฏิพทฺธนฺเต อยฺย จิตฺตนฺติ ฯ มุทุลกฺขณาย มหาราชาติ ฯ สาธุ อยฺย อหํ มุทุลกฺขณํ ตุมฺหากํ ทมฺมีติ ตาปสํ อาทาย นิเวสนํ ปวิสิตฺวา เทวึ สพฺพาลงฺการปฏิมณฺฑิตํ กตฺวา ตาปสสฺส อทาสิ ททมาโนเยว จ มุทุลกฺขณาย สญฺญํ อทาสิ ตยา อตฺตโน พเลน อยฺยํ รกฺขิตุํ วายมิตพฺพนฺติ ฯ สาธุ เทว รกฺขิสฺสามีติ ฯ ตาปโส เทวึ คเหตฺวา ราชนิเวสนา โอตริ ฯ อถ นํ มหาทฺวารโต นิกฺขนฺตกาเล อยฺย อมฺหากํ เคหํ ลทฺธุํ วฏฺฏติ คจฺฉ ราชานํ เคหํ ยาจาหีติ อาห ฯ ตาปโส คนฺตฺวา เคหํ ยาจิ ฯ ราชา มนุสฺสานํ วจฺจกุฏิกิจฺจํ สาธยมานํ เอกํ ฉฑฺฑิตเคหํ ทาเปสิ ฯ โส เทวึ คเหตฺวา ตตฺถ อคมาสิ ฯ สา ปวิสิตุํ น อิจฺฉิ ฯ กึการณา น ปวิสสีติ ฯ อสุจิภาเวนาติ ฯ อิทานิ กึ กโรมีติ ฯ ปฏิชคฺคาหิ นนฺติ วตฺวา รญฺโญ สนฺติกํ เปเสตฺวา คจฺฉกุทฺทาลํ อาหร ปจฺฉึ อาหราติ อาหราเปตฺวา อสุจิญฺจ สงฺการญฺจ ฉฑฺฑาเปตฺวา โคมยํ อาหราเปตฺวา วิลิมฺปาเปตฺวา ปุนปิ คจฺฉ มญฺจํ อาหร ปีฐํ อาหราติ เอกเมกํ อาหราเปตฺวา ปุน อุทกาหรณาทีนํ อตฺถาย อาณาเปสิ ฯ โส ฆฏํ อาทาย อุทกํ อาหริตฺวา จาฏึ ปูเรตฺวา นฺหาโนทกํ สชฺเชตฺวา สยนํ อตฺถริ ฯ อถ นํ สยเน เอกโต นิสินฺนํ ผาสุกาสุ คเหตฺวา อากฑฺฒิตฺวา ตว สมณภาวํ วา พฺราหฺมณภาวํ วา น ชานาสีติ โอนาเมตฺวา อตฺตโน อภิมุขํ อากฑฺฒิ ฯ โส ตสฺมึ กาเล สตึ ปฏิลภิ ฯ เอตฺตกมฺปน กาลํ อญฺญาณี อโหสิ ฯ เอวํ อญฺญาณกรณา กิเลสา นาม กามจฺฉนฺทนีวรณํ ภิกฺขเว อนฺธกรณํ อญฺญาณกรณนฺติ อาทิ เจตฺถ วตฺตพฺพํ ฯ โส สตึ ปฏิลภิตฺวา จินฺเตสิ อยํ ตณฺหา วฑฺฒมานา มม จตูหิ อุปาเยหิ สีสํ อุกฺขิปิตุํ น ทสฺสติ อชฺเชว มยา อิมํ รญฺโญ นิยฺยาเทตฺวา หิมวนฺตํ ปวิสิตุํ วฏฺฏตีติ ฯ โส ตํ อาทาย ราชานํ อุปสงฺกมิตฺวา มหาราช ตว เทวิยา มยฺหํ อตฺโถ นตฺถิ เกวลํ เม อิมํ นิสฺสาย ตณฺหา วฑฺฒิตาติ วตฺวา อิมํ คาถมาห