โส ธมฺเมน รชฺชํ กาเรนฺโต ปน เอกทิวสํ สปฺปาทโย ปริคฺคณฺหิตุกาโม มหนฺเตน ปริวาเรน สปฺปสฺส วสนฏฺฐานํ คนฺตฺวา ทีฆาติ ปกฺโกสิ ฯ สปฺโป อาคนฺตฺวา วนฺทิตฺวา อิทนฺเต สามิ ธนํ คณฺหาติ อาห ฯ ราชา จตฺตาฬีสหิรญฺญโกฏิธนํ อมจฺเจ ปฏิจฺฉาเปตฺวา อุนฺทุรสฺส สนฺติกํ คนฺตฺวา อุนฺทุราติ ปกฺโกสิ ฯ โสปิ อาคนฺตฺวา วนฺทิตฺวา ตึสโกฏิธนํ นิยฺยาเทสิ ฯ ราชา ตมฺปิ อมจฺเจ ปฏิจฺฉาเปตฺวา สุกสฺส วสนฏฺฐานํ คนฺตฺวา สุกาติ ปกฺโกสิ ฯ โสปิ อาคนฺตฺวา ปาเท วนฺทิตฺวา สามิ สาลี อาหรามีติ อาห ฯ ราชา สาลีหิ อตฺเถ สติ อาหริสฺสสิ เอหิ คจฺฉามาติ สตฺตติยา หิรญฺญโกฏีหิ สทฺธึ เต ตโยปิ ชเน คาหาเปตฺวา นครํ คนฺตฺวา ปาสาทวรมหาตลํ อารุยฺห ธนํ สงฺโคปาเปตฺวา สปฺปสฺส วสนตฺถาย สุวณฺณนาฬึ อุนฺทุรสฺส ผลิกคุหํ สุกสฺส สุวณฺณปญฺชรํ การาเปตฺวา สปฺปสฺส จ สุกสฺส จ โภชนตฺถาย เทวสิกํ กาญฺจนตฏฺฏเก มธุลาเช อุนฺทุรสฺส คนฺธสาลิตณฺฑุเล ทาเปสิ ทานาทีนิ ปุญฺญานิ กโรติ ฯ เอวํ เตปิ จตฺตาโร ชนา ยาวชีวํ สมคฺคา สมฺโมทมานา วิหริตฺวา ชีวิตกฺขเย ยถากมฺมํ อคมึสุ ฯ

สตฺถา น ภิกฺขเว เทวทตฺโต อิทาเนว มยฺหํ วธาย ปริสกฺกติ ปุพฺเพปิ ปริสกฺกิเยวาติ วตฺวา อิมํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ ตทา ทุฏฺฐราชา เทวทตฺโต อโหสิ สปฺโป สารีปุตฺโต อุนฺทุโร โมคฺคลฺลาโน สุโก อานนฺโท ปจฺฉารชฺชปฺปตฺตธมฺมราชา ปน อหเมวาติ ฯ

สจฺจํกิรชาตกํ ตติยํ ฯ