สาธุ สมฺพหุลา ญาตี อปิ รุกฺขา อรญฺญชา

วาโต วหติ เอกฏฺฐํ พฺรหนฺตมฺปิ วนปฺปตินฺติ ฯ

ตตฺถ สมฺพหุลาติ จตฺตาโร อุปาทาย ตตุตฺตรึ สตสหสฺสํปิ สมฺพหุลา นาม เอวํ สมฺพหุลา อญฺญมญฺญํ นิสฺสาย วสนฺตา ญาตกา สาธุ โสภนา ปสตฺถา ปเรหิ อปฺปธํสิยาติ อตฺโถ ฯ อปิ รุกฺขา อรญฺญชาติ ติฏฺฐนฺตุ มนุสฺสภูตา อรญฺเญ ชาตา รุกฺขาปิ สมฺพหุลา อญฺญมญฺญูปตฺถมฺเภน ฐิตา สาธุเยว รุกฺขานมฺปิ หิ สปจฺจยภาโว ลทฺธุํ วฏฺฏติ ฯ วาโต วหติ เอกฏฺฐนฺติ ปุรตฺถิมาทิเภโท วาโต วายนฺโต องฺคณฏฺฐาเน ฐิตํ เอกฏฺฐํ เอกเมว ฐิตํ ฯ พฺรหนฺตมฺปิ วนปฺปตินฺติ สาขาวิฏปสมฺปนฺนํ มหารุกฺขมฺปิ วหติ อุมฺมูเลตฺวา ปาเตตีติ อตฺโถ ฯ

โพธิสตฺโต อิมํ การณํ กเถตฺวา อายุกฺขเย ยถากมฺมงฺคโต ฯ