อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กาสีรฏฺเฐ อุทิจฺจพฺราหฺมณกุเล นิพฺพตฺติตฺวา วยปฺปตฺโต อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ อุปฺปาเทตฺวา ฌานกีฬํ กีฬนฺโต หิมวนฺตปฺปเทเส วสติ ปญฺจหิ อนฺเตวาสิกสเตหิ ปริวุโต ฯ อถ นํ วสฺสารตฺตสมเย สมฺปตฺเต อนฺเตวาสิกา อาหํสุ อาจริย มนุสฺสปถํ คนฺตฺวา โลณมฺพิลํ เสวิตฺวา อาคจฺฉามาติ ฯ อาวุโส อหํ อิเธว วสิสฺสามิ ตุมฺเห ปน คนฺตฺวา สรีรํ สนฺตปฺเปตฺวา วสฺสํ วีตินาเมตฺวา อาคจฺฉถาติ ฯ เต สาธูติ อาจริยํ วนฺทิตฺวา พาราณสึ คนฺตฺวา ราชุยฺยาเน วสิตฺวา ปุนทิวเส พหิทฺวารคาเมเยว ภิกฺขาย จริตฺวา สุหิตา หุตฺวา ปุนทิวเส นครํ ปวิสึสุ ฯ มนุสฺสา สมฺปิยายมานา ภิกฺขํ อทํสุ กติปาหจฺจเยน รญฺโญปิ อาโรเจสุํ เทว หิมวนฺตโต ปญฺจสตา อิสโย อาคนฺตฺวา อุยฺยาเน วสนฺติ โฆรตปา ปรมชิตินฺทฺริยา สีลวนฺโตติ ฯ ราชา เตสํ คุเณ สุตฺวา อุยฺยานํ คนฺตฺวา วนฺทิตฺวา กตปฺปฏิสณฺฐาโร วสฺสานํ จาตุมฺมาสํ ตตฺเถว วสนตฺถาย ปฏิญฺญํ คเหตฺวา นิมนฺเตสิ ฯ เต ตโต ปฏฺฐาย ราชเคเหเยว ภุญฺชิตฺวา อุยฺยาเน วสนฺติ ฯ

อเถกทิวสํ นคเร สุรานกฺขตฺตํ นาม อโหสิ ฯ ราชา ปพฺพชิตานํ สุรา ทุลฺลภาติ พหุํ อุตฺตมํ สุรํ ทาเปสิ ฯ ตาปสา สุรํ ปิวิตฺวา อุยฺยานํ คนฺตฺวา สุรามทมตฺตา หุตฺวา เอกจฺเจ อุฏฺฐาย นจฺจึสุ เอกจฺเจ คายึสุ นจฺจิตฺวา คายิตฺวา ขาริกาทีนิ อวตฺถริตฺวา นิทฺทายิตฺวา สุรามเท ฉินฺเน ปพุชฺฌิตฺวา ตํ อตฺตโน วิปฺปการํ ทิสฺวา น อมฺเหหิ ปพฺพชิตสารุปฺปํ กตนฺติ โรทิตฺวา ปริเทวิตฺวา มยํ อาจริเยน วินา เอวรูปํ ปาปกมฺมํ กริมฺหาติ ตํ ขณญฺเญว อุยฺยานํ ปหาย หิมวนฺตํ คนฺตฺวา ปฏิสามิตปริกฺขารา อาจริยํ วนฺทิตฺวา นิสีทิตฺวา กึ นุ โข ตาตา มนุสฺสปเถ ภิกฺขาย อกิลมานา สุขํ วสิตฺถ สมคฺคสํวาสญฺจ ปน วสิตฺถาติ ปุจฺฉิตา อาจริย สุขํ วสิมฺหา อปิจ โข มยํ อปาตพฺพยุตฺตกํ ปิวิตฺวา วิสญฺญีภูตา สตึ ปจฺจุปฏฺฐเปตุํ อสกฺโกนฺตา คายิมฺหา เจว นจฺจิมฺหา จาติ เอตมตฺถํ อาโรเจนฺตา อิมํ คาถํ สมุฏฺฐาเปตฺวา อาหํสุ

อปายิมฺห อนจฺจิมฺห อคายิมฺห รุทิมฺห จ

วิสญฺญิกรณึ ปิตฺวา ทิฏฺฐา นาหุมฺห วานราติ ฯ