อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส ปุโรหิโต อโหสิ ทานาธิมุตฺโต สีลชฺฌาสโย อขณฺฑปญฺจสีโล ฯ ราชา เสสพฺราหฺมเณหิ อติเรกตรํ ตสฺส สมฺมานํ กโรตีติ สพฺพํ ปุริมสทิสเมว ฯ โพธิสตฺเต ปน พนฺธิตฺวา รญฺโญ สนฺติกํ นียมาเน อหิคุณฺฑิกา อนฺตรวีถิยํ สปฺปํ กีฬาเปนฺตา นํ นงฺคุฏฺเฐ คณฺหนฺติ คีวาย คณฺหนฺติ คเล เวเฐนฺติ ฯ โพธิสตฺโต เต ทิสฺวา มา ตาตา เอตํ สปฺปํ นงฺคุฏฺเฐ คณฺหถ มา คีวายํ คณฺหถ มา คเล เวเฐถ อยญฺหิ เต ฑํสิตฺวาว ชีวิตกฺขยํ ปาเปยฺยาติ อาห ฯ อหิคุณฺฑิกา อยํ พฺราหฺมณ สปฺโป สีลวา อาจารสมฺปนฺโน ตาทิโส ทุสฺสีโล น โหติ ตฺวํ ปน อตฺตโน ทุสฺสีลตาย อนาจาโร ราชกุฏุมฺพ- วิลุมฺปกโจโรติ พนฺธิตฺวา นิยฺยาสีติ อาหํสุ ฯ โส จินฺเตสิ สปฺปาปิ ตาว อฑํสนฺตา อวิเหเฐนฺตา สีลวนฺโตติ นามํ ลภนฺติ กิมงฺคํ ปน มนุสฺสภูตา สีลเมว อิมสฺมึ โลเก อุตฺตมํ นาม นตฺถิ ตโต อุตฺตริตรนฺติ ฯ อถ นํ เนตฺวา รญฺโญ ทสฺเสสุํ ฯ ราชา กึ อิทํ ตาตาติ ปุจฺฉิ ฯ ราชกุฏุมฺพวิลุมฺปกโจโร เทวาติ ฯ เตนหิสฺส ราชาณํ กโรถาติ ฯ พฺราหฺมโณ นาหํ มหาราช โจโรติ อาห ฯ อถ กสฺมา กหาปเณ อคฺคเหสีติ จ วุตฺเต ปุริมนเยเนว สพฺพํ อาโรเจนฺโต สฺวาหํ อิมินา การเณน อิมสฺมึ โลเก สีลเมว อุตฺตมํ สีลํ ปาโมกฺขนฺติ สนฺนิฏฺฐานํ คโตติ วตฺวา ติฏฺฐตุ ตาว อิทํ อาสีวิโสปิ ตาว อฑํสนฺโต อวิเหเฐนฺโต สีลวาติ วตฺตพฺพตํ ลภติ อิมินาปิ การเณน สีลเมว อุตฺตมํ สีลํ ปวรนฺติ สีลํ วณฺเณนฺโต อิมํ คาถมาห

สีลํ กิเรว กลฺยาณํ สีลํ โลเก อนุตฺตรํ

ปสฺส โฆรวิโส นาโค สีลวาติ น หญฺญตีติ ฯ

ตตฺถ สีลํ กิเรวาติ กายวาจาจิตฺเตหิ อวีติกฺกมนสงฺขาตํ อาจารสีลเมว ฯ กิเรติ อนุสฺสววเสน วทติ ฯ กลฺยาณนฺติ สุนฺทรํ ปวรํ ฯ อนุตฺตรนฺติ เชฏฺฐกํ สพฺพคุณทายกํ ฯ ปสฺสาติ อตฺตนา ทิฏฺฐการณํ อภิมุขํ กโรนฺโต กเถสิ ฯ สีลวาติ น หญฺญตีติ โฆรวิโสปิ สมาโน อฑํสนอวิเหฐนมตฺตเกน สีลวาติ ปสํสํ ลภติ น หญฺญติ น วิหญฺญตีติ อิมินาปิ การเณน สีลเมว อุตฺตมนฺติ ฯ