๑๐ อสาตรูปชาตกํ

อสาตํ สาตรูเปนาติ อิทํ สตฺถา กุณฺฑิยนครํ อุปนิสฺสาย กุณฺฑธานวเน วิหรนฺโต โกลิยราชธีตรํ สุปฺปวาสํ อุปาสิกํ อารพฺภ กเถสิ ฯ

สา หิ ตสฺมึ สมเย สตฺต วสฺสานิ กุจฺฉินา คพฺภํ ปริหริตฺวา สตฺตาหํ มูฬฺหคพฺภา อโหสิ ฯ อธิมตฺตา เวทนา ปวตฺตึสุ ฯ สา เอวํ อธิมตฺตา เวทนาภิตุนฺนาปิ สมฺมาสมฺพุทฺโธ วต โส ภควา โย เอวรูปสฺส ทุกฺขสฺส ปหานาย ธมฺมํ เทเสสิ สุปฏิปนฺโน วตสฺส ภควโต สาวกสงฺโฆ โย เอวรูปสฺส ทุกฺขสฺส ปหานาย ปฏิปนฺโน สุขํ วต นิพฺพานํ ยตฺเถว รูปํ ทุกฺขํ นตฺถีติ อิเมหิ ตีหิ วิตกฺเกหิ ทุกฺขํ อธิวาเสสิ ฯ สา สามิกํ ปกฺโกสาเปตฺวา ตญฺจ อตฺตโน ปวุตฺตึ วนฺทนสาสนญฺจ อาโรเจตุํ สตฺถุ สนฺติกํ เปเสสิ ฯ สตฺถา วนฺทนสาสนํ สุตฺวาว สุขินี โหตุ สุปฺปวาสา โกลิยธีตา สุขินี อโรคา อโรคํ ปุตฺตํ วิชายตูติ อาห ฯ สห วจนาว ปน ภควโต สุปฺปวาสา โกลิยธีตา สุขินี อโรคา อโรคํ ปุตฺตํ วิชายิ ฯ อถสฺสา สามิโก เคหํ คนฺตฺวา ตํ วิชาตํ ทิสฺวา อจฺฉริยํ วต โภติ อติวิย ตถาคตสฺสานุภาโวติ อจฺฉริยพฺภุตจิตฺตชาโต อโหสิ ฯ สุปฺปวาสาปิ ปุตฺตํ วิชายิตฺวา สตฺตาหํ พุทฺธปฺปมุขสฺส ภิกฺขุสงฺฆสฺส มหาทานํ ทาตุกามา ปุน นิมนฺตนตฺถาย ตํ เปเสสิ ฯ เตน โข ปน สมเยน มหาโมคฺคลฺลานสฺส อุปฏฺฐาเกน พุทฺธปฺปมุโข ภิกฺขุสงฺโฆ นิมนฺติโต โหติ ฯ สตฺถา สุปฺปวาสาย ทานสฺส โอกาสทานตฺถาย เถรสฺส สนฺติกํ เปเสตฺวา ตํ สญฺญาเปตฺวา สตฺตาหํ ตสฺสา ทานํ ปฏิคฺคเหสิ สทฺธึ ภิกฺขุสงฺเฆน ฯ

สตฺตเม ปน ทิวเส สุปฺปวาสา ปุตฺตํ สีวลิกุมารํ มณฺเฑตฺวา สตฺถารญฺจ ภิกฺขุสงฺฆญฺจ วนฺทาเปสิ ฯ ตสฺมึ ปฏิปาฏิยา สารีปุตฺตตฺเถรสฺส สนฺติกํ นีเต เถโร เตน สทฺธึ กจฺจิ เต สีวลิ ขมนียนฺติ ปฏิสณฺฐารํ อกาสิ ฯ โส กุโต เม ภนฺเต สุขํ สฺวาหํ สตฺต วสฺสานิ โลหกุมฺภิยํ วสินฺติ เถเรน สทฺธึ เอวรูปํ กถํ กเถสิ ฯ สุปฺปวาสา ตสฺส วจนํ สุตฺวา สตฺตาหํ ชาโต มม ปุตฺโต อนุพุทฺเธน ธมฺมเสนาปตินา สทฺธึ มนฺเตตีติ โสมนสฺสปฺปตฺตา อโหสิ ฯ สตฺถา อปิ นุ สุปฺปวาเส อญฺเญปิ เอวรูเป ปุตฺเต อิจฺฉสีติ อาห ฯ สเจ ภนฺเต เอวรูเป อญฺเญ สตฺต ปุตฺเต ลเภยฺยํ อิจฺเฉยฺยาเมวาหนฺติ ฯ สตฺถา อุทานํ อุทาเนตฺวา อนุโมทนํ กตฺวา ปกฺกามิ ฯ สีวลิกุมาโรปิ โข สตฺตวสฺสิกกาเลเยว สาสเน อุรํ ทตฺวา ปพฺพชิตฺวา ปริปุณฺณวสฺโส อุปสมฺปทํ ลภิตฺวา ปุญฺญวา ลาภคฺคยสคฺคปฺปตฺโต หุตฺวา ปฐวึ อุนฺนาเทตฺวา อรหตฺตํ ปตฺวา ปุญฺญวนฺตานํ อนฺตเร เอตทคฺคฏฺฐานํ ปาปุณิ ฯ อเถกทิวสํ ภิกฺขู ธมฺมสภายํ สนฺนิปติตฺวา อาวุโส สีวลิตฺเถโร นาม เอวรูโป มหาปุญฺโญ ปฏฺฐิตปฏฺฐโน ปจฺฉิมภวิกสตฺโต สตฺต วสฺสานิ โลหกุมฺภิยํ วสิ สตฺตาหํ มูฬฺหคพฺภภาวํ อาปชฺชิ อโห มาตา มหนฺตํ ทุกฺขํ อนุภวิ เต กินฺนุ โข กมฺมมกํสูติ กถํ สมุฏฺฐาเปสุํ ฯ สตฺถา ตตฺถ คนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต ภิกฺขเว สีวลิโน มหาปุญฺญวโตว สตฺต วสฺสานิ โลหกุมฺภิยํ นิวาโส จ สตฺตาหํ มูฬฺหคพฺภภาวปฺปตฺติ จ อตฺตนา กตกมฺมมูลกาว ตสฺสา สุปฺปวาสายปิ สตฺต วสฺสานิ กุจฺฉินา คพฺภปริหรณทุกฺขญฺจ สตฺตาหํ มูฬฺหคพฺภทุกฺขญฺจ อตฺตนา กตกมฺมมูลกเมวาติ วตฺวา เตหิ ยาจิโต อตีตํ อาหริ ฯ