อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส อคฺคมเหสิยา กุจฺฉิสฺมึ ปฏิสนฺธึ คณฺหิตฺวา วยปฺปตฺโต ตกฺกสิลายํ สพฺพสิปฺปานิ อุคฺคณฺหิตฺวา ปิตุ อจฺจเยน ธมฺเมน รชฺชํ กาเรสิ ฯ ตสฺมึ สมเย โกสลราชา มหนฺเตน พเลน อาคนฺตฺวา พาราณสึ คเหตฺวา ตํ ราชานํ มาเรตฺวา ตสฺเสว อคฺคมเหสึ อตฺตโน อคฺคมเหสึ อกาสิ ฯ พาราณสีรญฺโญ ปน ปุตฺโต ปิตุ มรณกาเล นิทฺธมนทฺวาเรน ปลายิตฺวา พลํ สํหริตฺวา พาราณสึ อาคนฺตฺวา อวิทูเร นิสีทิตฺวา ตสฺส รญฺโญ ปณฺณํ เปเสสิ รชฺชํ วา เทตุ ยุทฺธํ วาติ ฯ โส ยุทฺธํ ทมฺมีติ ปฏิปณฺณํ เปเสสิ ฯ ราชกุมารสฺส ปน มาตา ตํ สาสนํ สุตฺวา ยุทฺเธน กมฺมํ นตฺถิ ตสฺส สตฺต ทิวสานิ สญฺจารํ ปจฺฉินฺทิตฺวา พาราณสีนครํ ปริวาเรตุ ตโต ทารุทกภตฺตปริกฺขเยน กิลนฺตมนุสฺสํ นครํ วินาว ยุทฺเธน คณฺหิสฺสตีติ ปณฺณํ เปเสสิ ฯ โส มาตุ สาสนํ สุตฺวา สตฺต ทิวสานิ สญฺจารํ ปจฺฉินฺทิตฺวา นครํ รุนฺธิ ฯ นาครา สญฺจารํ อลภมานา สตฺตเม ทิวเส ตสฺส รญฺโญ สีสํ คเหตฺวา กุมารสฺส อทํสุ ฯ กุมาโร นครํ ปวิสิตฺวา รชฺชํ คเหตฺวา อายุหปริโยสาเน ยถากมฺมํ คโต ฯ

โส เอตรหิ สตฺต ทิวสานิ สญฺจารํ ปจฺฉินฺทิตฺวา นครํ รุนฺธิตฺวา คหิตกมฺมนิสฺสนฺเทน สตฺต วสฺสานิ โลหกุมฺภิยํ วสิตฺวา สตฺตาหํ มูฬฺหคพฺภภาวํ อาปชฺชติ ยมฺปน โส ปทุมุตฺตรปาทมูเล ลาภีนํ อคฺโค ภเวยฺยนฺติ มหาทานํ ทตฺวา ปฏฺฐนํ อกาสิ ยญฺจ วิปสฺสิพุทฺธกาเล นาคเรหิ สทฺธึ สหสฺสคฺฆนิกํ คุฬทธึ ทตฺวา ปฏฺฐนํ อกาสิ ตสฺสานุภาเวน ลาภีนํ อคฺโค ชาโต ฯ สุปฺปวาสาปิ นครํ รุนฺธิตฺวา คณฺห ตาตาติ เปสิตภาเวน สตฺต วสฺสานิ กุจฺฉินา คพฺภํ ปริหริตฺวา สตฺตาหํ มูฬฺหคพฺภา ชาตาติ ฯ สตฺถา อิมํ อตีตํ อาหริตฺวา อภิสมฺพุทฺโธ หุตฺวา อิมํ คาถมาห

อสาตํ สาตรูเปน ปิยรูเปน อปฺปิยํ

ทุกฺขํ สุขสฺส รูเปน ปมตฺตมติวตฺตตีติ ฯ