ยตฺถ เวรี นิวีสติ น วเส ตตฺถ ปณฺฑิโต

เอกรตฺตึ ทฺวิรตฺตึ วา ทุกฺขํ วสติ เวริสูติ ฯ

ตตฺถ เวรีติ เวรเจตนาสมงฺคิปุคฺคโล ฯ นิวีสตีติ ปติฏฺฐาติ ฯ น วเส ตตฺถ ปณฺฑิโตติ โส เวริปุคฺคโล ยสฺมึ ฐาเน ปติฏฺฐิโต หุตฺวา วสติ ตตฺถ ปณฺฑิโต ปณฺฑิจฺเจน สมนฺนาคโต น วเสยฺย ฯ กึการณา ฯ เอกรตฺตึ ทฺวิรตฺตึ วา ทุกฺขํ วสติ เวริสูติ เวรีนญฺหิ อนฺตเร วสนฺโต เอกาหมฺปิ ทฺวีหมฺปิ ทุกฺขเมว วสตีติ อตฺโถ ฯ

เอวํ โพธิสตฺโต อุทานํ อุทาเนตฺวา ทานาทีนิ ปุญฺญานิ กตฺวา ยถากมฺมํ คโต ฯ