โจริ ชายปฺปวาเทน เตลํ โลณญฺจ ยาจตีติ ฯ

ตตฺถ สุขํ วต มํ ชีวนฺตนฺติ ตาต ตุมฺหากํ สนฺติเก มํ สุขํ ชีวนฺตํ ฯ ปจมานาติ ตาปยมานา ปีฬยมานา ยํ ยํ ขาทิตุกามา โหติ ตํ ตํ ปจมานา ฯ อุทกํ อญฺจนฺติ เอตายาติ อุทญฺจนี ฯ จาฏิโต วา กูปโต วา อุทกํ โอสิญฺจนฆฏิกาเยตํ นามํ ฯ สา ปน อุทญฺจนี อุทกํ วิย ฆฏิกาย เยน เยนตฺถิกา ตํ ตํ อากฑฺฒติเยวาติ อตฺโถ ฯ โจริ ชายปฺปวาเทนาติ ภริยาติ นาเมน เอกา โจรี มํ มธุรวจเนน อุปลาเปตฺวา ตตฺถ เนตฺวา เตลํ โลณญฺจ ยญฺจ อญฺญํ อิจฺฉติ ตํ สพฺพํ ยาจติ ทาสํ วิย กมฺมกรํ วิย กตฺวา อาหราเปตีติ ตสฺมา อคุณํ กเถสิ ฯ

อถ นํ โพธิสตฺโต อสฺสาเสตฺวา โหตุ ตาต เอหิ ตฺวํ เมตฺตํ ภาเวหิ กรุณํ ภาเวหีติ จตฺตาโร พฺรหฺมวิหาเร อาจิกฺขิ กสิณปริกมฺมํ อาจิกฺขิ ฯ โส นจิรสฺเสว อภิญฺญา จ สมาปตฺติโย จ อุปฺปาเทตฺวา พฺรหฺมวิหาเร ภาเวตฺวา สทฺธึ ปิตรา พฺรหฺมโลเก นิพฺพตฺติ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน โส ภิกฺขุ โสตาปตฺติผเล ปติฏฺฐหิ ฯ ตทา ถุลฺลกุมาริกา เอตรหิ ถุลฺลกุมาริกา จูฬกุมารตาปโส อุกฺกณฺฐิตภิกฺขุ อโหสิ ปิตา ปน อหเมวาติ ฯ