โส นิวตฺติตฺวา โพธิสตฺตํ โอโลเกตฺวา พลิกมฺมมกาสิ ฯ โพธิสตฺโต ตโต โอชํ ปริภุญฺชิตฺวา ปุริส ตฺวํ กิมตฺถํ มํ ปฏิชคฺคสีติ อาห ฯ ทุคฺคโตมฺหิ สามิ ตํ นิสฺสาย ทุคฺคตภาวโต มุจฺจิตุกามตาย ปฏิชคฺคามีติ ฯ อมฺโภ ปุริส มา จินฺตยิ ตยา กตญฺญุสฺส กตเวทิโน ปูชา กตา อิมํ เอรณฺฑรุกฺขํ ปริกฺขิปิตฺวา นิธิกุมฺภิโย คีวาย คีวํ อาหจฺจ ฐิตา ตฺวํ รญฺโญ อาจิกฺขิตฺวา สกเฏหิ ธนํ อาหริตฺวา ราชงฺคเณ ราสึ กโรหิ ราชา เต ตุสฺสิตฺวา เสฏฺฐิฏฺฐานํ ทสฺสตีติ วตฺวา โพธิสตฺโต อนฺตรธายิ ฯ โส ตถา อกาสิ ฯ ราชาปิสฺส เสฏฺฐิฏฺฐานํ อทาสิ ฯ อิติ โส โพธิสตฺตํ นิสฺสาย มหาสมฺปตฺตึ ปตฺวา ยถากมฺมํ คโต ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ทุคฺคโต เอตรหิ ทุคฺคโต อโหสิ เอรณฺฑรุกฺขเทวตา ปน อหเมวาติ ฯ

กุณฺฑกปูวชาตกํ นวมํ ฯ