อถสฺส ปจฺจนฺโต กุปิโต ฯ ปจฺจนฺเต ฐิตา โยธา โจเรหิ สทฺธึ เทฺว ตโย สงฺคาเม กตฺวา อิโต อุตฺตรึ มยํ น สกฺโกมาติ รญฺโญ ปณฺณํ เปเสสุํ ฯ ราชา ตตฺถ คนฺตุกาโม พลกายํ สํหริตฺวา ตํ ปกฺโกสิตฺวา ภทฺเท อหํ ปจฺจนฺตํ คจฺฉามิ ตตฺถ นานปฺปการานิ ยุทฺธานิ โหนฺติ ชยปราชโยปิ อนิพทฺโธ ตาทิเสสุ ฐาเนสุ มาตุคาโม ทุปฺปริหาโร ตฺวํ อิเธว นิวตฺตาหีติ อาห ฯ สาปิ น สกฺกา เทว มยา นิวตฺติตุนฺติ ปุนปฺปุนํ รญฺญา ปฏิกฺขิตฺตา อาห เตนหิ เอเกกํ โยชนํ คนฺตฺวา มยฺหํ สุขทุกฺขํ ชานนตฺถํ เอเกกํ มนุสฺสํ เปเสยฺยาถาติ ฯ ราชา สาธูติ สมฺปฏิจฺฉิตฺวา โพธิสตฺตํ นคเร ฐเปตฺวา มหนฺเตน พลกาเยน นิกฺขมิตฺวา คจฺฉนฺโต โยชเน โยชเน เอเกกํ ปุริสํ อมฺหากํ อาโรคฺยํ อาโรเจตฺวา เทวิยา สุขทุกฺขํ ชานิตฺวา อาคจฺฉาติ เปเสสิ ฯ สา อาคตาคตปุริสํ ราชา ตํ กิมตฺถํ เปเสสีติ ปุจฺฉิตฺวา ตุมฺหากํ สุขทุกฺขํ ชานนตฺถายาติ วุตฺเต เตนหิ เอหีติ เตน สทฺธึ อสทฺธมฺมํ ปฏิเสวติ ฯ ราชา ทฺวตฺตึสโยชนมคฺคํ คจฺฉนฺโต ทฺวตฺตึส ชเน เปเสสิ ฯ สา สพฺเพหิ เตหิ สทฺธึ ตเถว อกาสิ ฯ

ราชา ปจฺจนฺตํ วูปสเมตฺวา ชนปทํ สมสฺสาเสตฺวา ปุน อาคจฺฉนฺโต ตเถว ทฺวตฺตึส ชเน เปเสสิ ฯ สา เตหิปิ สทฺธึ วิปฺปฏิปชฺชิเยว ฯ ราชา อาคนฺตฺวา ชยขนฺธาวารฏฺฐาเน ฐตฺวา นครํ ปฏิชคฺคาเปตูติ โพธิสตฺตสฺส ปณฺณํ เปเสสิ ฯ โพธิสตฺโต สกลนครํ ปฏิชคฺคาเปตฺวา ราชนิเวสนํ ปฏิชคฺคาเปนฺโต เทวิยา วสนฏฺฐานํ อคมาสิ ฯ สา โพธิสตฺตสฺส รูปโสภคฺคปฺปตฺตํ กายํ ทิสฺวา สณฺฐาตุํ อสกฺโกนฺตี เอหิ พฺราหฺมณ สยนํ อภิรุหาติ อาห ฯ โพธิสตฺโต มา เอวํ อวจ ราชาปิ เม ครุ อกุสลาปิ ภายามิ น สกฺกา มยา เอวํ กาตุนฺติ อาห ฯ จตุสฺสฏฺฐิยา ปาทมูลิกานํ เนว ราชา ครุ น อกุสลา ภายนฺติ ตเวว ราชา ครุ ตฺวํเยว จ อกุสลา ภายสีติ ฯ อาม สเจ เตสมฺปิ เอวํ ภเวยฺย น เอวรูปํ กเรยฺยํ อหมฺปน ชานมาโน เอวรูปํ สาหสิกกมฺมํ น กริสฺสามีติ ฯ กึ พหุํ วิปฺปลปสิ สเจ เม วจนํ น กโรสิ สีสนฺเต ฉินฺทาเปสฺสามีติ ฯ ติฏฺฐตุ เอกสฺมึ อตฺตภาเว สีสํ อตฺตภาวสหสฺเสปิ สีเส ฉินฺทนฺเตน น สกฺกา มยา เอวรูปํ กาตุนฺติ ฯ สา โหตุ ชานิสฺสามีติ โพธิสตฺตํ ตชฺเชตฺวา อตฺตโน คพฺภํ ปวิสิตฺวา สรีเร นขวลญฺชํ ทสฺเสตฺวา เตเลน คตฺตานิ อพฺภญฺชิตฺวา กิลิฏฺฐวตฺถํ นิวาเสตฺวา คิลานาลยํ กตฺวา ทาสิโย อาณาเปสิ รญฺญา กหํ เทวีติ วุตฺเต คิลานาติ กเถยฺยาถาติ ฯ