โพธิสตฺโตปิ รญฺโญ ปฏิปถํ อคมาสิ ฯ ราชา นครํ ปทกฺขิณํ กตฺวา ปาสาทํ อภิรุยฺห กหํ เทวีติ ปุจฺฉิ ฯ คิลานา เทวาติ ฯ โส สิริคพฺภํ ปวิสิตฺวา ตสฺสา ปิฏฺฐึ ปริมชฺชนฺโต กินฺเต ภทฺเท อผาสุกนฺติ ปุจฺฉิ ฯ สา ตุณฺหี อโหสิ ฯ ตติยวาเร ราชานํ โอโลเกตฺวา ตฺวํปิ มหาราช ชีวสิ นาม มาทิสาปิ อิตฺถิโย สสฺสามิกาเยวาติ อาห ฯ กึ ปน เอตํ ภทฺเทติ ฯ ตุมฺเหหิ นครํ รกฺขนตฺถาย ฐปิตปุโรหิโต นิเวสนํ ปฏิชคฺคามีติ อิธาคนฺตฺวา อตฺตโน วจนํ อกโรนฺตํ มํ ปหริตฺวา อตฺตโน มนํ ปูเรตฺวา คโตติ ฯ ราชา อคฺคิมฺหิ ปกฺขิตฺตโลณสกฺขรา วิย โกเธน ตฏตฏายนฺโต สิริคพฺภา นิกฺขมิตฺวา โทวาริกปาทมูลิกาทโย ปกฺโกสาเปตฺวา คจฺฉถ ภเณ ปุโรหิตํ ปจฺฉาพาหุํ พนฺธิตฺวา วชฺเภาวปฺปตฺตํ กตฺวา นครา นีหริตฺวา อาฆาตนํ เนตฺวา สีสมสฺส ฉินฺทถาติ อาห ฯ เต เวเคน คนฺตฺวา ตํ ปจฺฉาพาหุํ พนฺธิตฺวา วชฺฌเภรึ จาราเปสุํ ฯ โพธิสตฺโต จินฺเตสิ อทฺธา ตาย ทุฏฺฐเทวิยา ราชา ปุเรตรํ ปริภินฺโน อชฺชทานาหํ อตฺตโน พเลเนว อตฺตานํ โมเจสฺสามีติ ฯ โส เต ปุริเส อาห โภ ตุมฺเห มํ อมาเรนฺตา รญฺโญ ทสฺเสตฺวาว มาเรถาติ ฯ กึการณาติ ฯ อหํ ราชกมฺมิโก พหุํ เม กมฺมํ กตํ พหูนิ นิธิฏฺฐานานิ ชานามิ ราชกุฏุมฺพํ มยา วิจาริตํ สเจ มํ รญฺโญ น ทสฺเสสฺสถ พหุํ ธนํ นสฺสิสฺสติ มยา รญฺโญ สาปเตยฺเย อาจิกฺขิเต ปจฺฉา กาตพฺพํ กโรถาติ ฯ เต ตํ รญฺโญ ทสฺสยึสุ ฯ

ราชา ตํ ทิสฺวาว กสฺมา โภ พฺราหฺมณ มยิ ลชฺชํ นากาสิ กสฺมา เต เอวรูปํ ปาปกมฺมํ กตนฺติ อาห ฯ มหาราช โส อหํ โสตฺถิยกุเล ชาโต มยา กุนฺถกิปิลฺลกมตฺโตปิ ปาณาติปาโต น กตปุพฺโพ ติณสลากมตฺตมฺปิ อทินฺนํ นาทินฺนปุพฺพํ โลภวเสน ปเรสํ อิตฺถี อกฺขีนิ อุมฺมิเลตฺวาปิ น โอโลกิตปุพฺพา หสนวเสนาปิ มุสา น ภาสิตปุพฺพา กุสคฺเคนาปิ มชฺชํ น ปีวิตปุพฺพํ อหํ ตุมฺเหสุ นิรปราโธ สา ปน พาลา โลภวเสน มํ หตฺเถ คเหตฺวา มยา ปฏิกฺขิตฺตา มํ ตชฺเชตฺวา อตฺตนา กตปาปํ อุตฺตานํ กตฺวา มม อาจิกฺขิตฺวา อนฺโตคพฺภํ ปวิฏฺฐา อหํ นิรปราโธ ปณฺณํ คเหตฺวา ปน อาคตา จตุสฺสฏฺฐิชนา สาปราธา เต ปกฺโกสิตฺวา ตสฺสา เตสํ วจนํ กตํ น กตนฺติ ปุจฺฉ เทวาติ ฯ ราชา เต จตุสฺสฏฺฐิชเน พนฺธาเปตฺวา เทวึ ปกฺโกสาเปตฺวา ตยา เอเตหิ สทฺธึ ปาปกมฺมํ กตํ น กตนฺติ ปุจฺฉิ กตํ เทวาติ วุตฺเต ตํ ปจฺฉาพาหุํ พนฺธาเปตฺวา อิเมสํ จตุสฺสฏฺฐิชนานํ สีสานิ ฉินฺทถาติ อาณาเปสิ ฯ อถ นํ โพธิสตฺโต อาห นตฺถิ มหาราช เอเตสํ โทโส เทวี อตฺตโน รุจึ การาเปสิ นิรปราธา เอเต ตสฺมา เนสํ ขมถ ตสฺสาปิ โทโส นตฺถิ อิตฺถิโย นาม เมถุนธมฺเมน อติตฺตา ชาติสภาโว หิ เอส เอตาสํ ภวิตพฺพยุตฺตกเมว โหติ ตสฺมา เอตสฺสาปิ ขมถาติ นานปฺปกาเรน ราชานํ สญฺญาเปตฺวา เต จตุสฺสฏฺฐิชเน ตญฺจ พาลํ โมเจตฺวา สพฺเพสํ ยถาสกานิ ฐานานิ ทาเปสิ ฯ เอวํ เต สพฺเพ โมจาเปตฺวา สกฏฺฐาเน ปติฏฺฐาเปตฺวา โพธิสตฺโต ราชานํ อุปสงฺกมิตฺวา มหาราช อนฺธพาลานํ นาม อวตฺถุเกน วจเนน อพนฺธิตพฺพยุตฺตกา ปณฺฑิตา ปจฺฉาพาหุํ พนฺธา ปณฺฑิตา การณยุตฺเตน วจเนน ปจฺฉาพาหุํ พนฺธาปิ มุตฺตา เอวํ พาลา นาม อพนฺธิตพฺพยุตฺตเกปิ พนฺธาเปนฺติ ปณฺฑิตา พนฺเธหิ โมเจนฺตีติ วตฺวา อิมํ คาถมาห