อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต รญฺโญ อุยฺยาเน กุสนาฬิคจฺเฉ เทวตา หุตฺวา นิพฺพตฺติ ฯ ตสฺมึเยว ปน อุยฺยาเน มงฺคลสิลํ นิสฺสาย อุชุคตกฺขนฺโธ ปริมณฺฑลสาขาวิฏปสมฺปนฺโน รญฺโญ สนฺติกา ลทฺธสมฺมาโน รุจมงฺคลรุกฺโข อตฺถิ ฯ สมุขโกติปิ วุจฺจติ ฯ ตสฺมึ เอโก มเหสกฺโข เทวราชา นิพฺพตฺติ ฯ โพธิสตฺตสฺส เตน สทฺธึ มิตฺตสนฺถโว อโหสิ ฯ ตทา ราชา เอกตฺถมฺภเก ปาสาเท วสติ ฯ ตสฺส โส ถมฺโภ จลิ ฯ อถสฺส จลิตภาวํ รญฺโญ อาโรเจสุํ ฯ ราชา วฑฺฒกี ปกฺโกสาเปตฺวา ตาตา มม เอกตฺถมฺภกสฺส มงฺคลปฺปาสาทสฺส ถมฺโภ จลิโต เอกํ สารตฺถมฺภํ อาหริตฺวา ตํ นิจฺจลํ กาเรถาติ อาห ฯ เต สาธุ เทวาติ รญฺโญ วจนํ สมฺปฏิจฺฉิตฺวา ตทนุจฺฉวิกํ รุกฺขํ ปริเยสมานา อญฺญตฺถ อทิสฺวา อุยฺยานํ ปวิสิตฺวา ตํ สมุขกรุกฺขํ ทิสฺวา รญฺโญ สนฺติกํ คนฺตฺวา กึ ตาตา ทิฏฺโฐ ตทนุจฺฉวิโก รุกฺโขติ วุตฺเต ทิฏฺโฐ เทว อปิจ โข นํ ฉินฺทิตุํ น วิสหามาติ อาหํสุ ฯ กึการณาติ ฯ มยํ อญฺญตฺร รุกฺขํ อปสฺสนฺตา อุยฺยานํ ปวิสิมฺหา ตตฺราปิ ฐเปตฺวา มงฺคลรุกฺขํ อญฺญํ น ปสฺสาม อิติ นํ มงฺคลรุกฺขตาย ฉินฺทิตุํ น วิสหามาติ ฯ คจฺฉถ ฉินฺทิตฺวา ปาสาทํ ถิรํ กโรถ มยํ อญฺญํ มงฺคลรุกฺขํ กริสฺสามาติ ฯ เต สาธูติ พลิกมฺมํ คเหตฺวา อุยฺยานํ คนฺตฺวา เสฺว ฉินฺทิสฺสามาติ รุกฺขสฺส พลิกมฺมํ กตฺวา นิกฺขมึสุ ฯ รุกฺขเทวตา ตํ การณํ ญตฺวา เสฺว มยฺหํ วิมานํ นาเสสฺสติ ทารเก คเหตฺวา กุหึ คมิสฺสามีติ คนฺตพฺพฏฺฐานํ อปสฺสนฺตี ปุตฺตเก คีวายํ คเหตฺวา ปโรทิ ฯ ตสฺสา สนฺทิฏฺฐสมฺภตฺตา รุกฺขเทวตา คนฺตฺวา กึ เอตนฺติ ปุจฺฉิตฺวา ตํ การณํ สุตฺวา สยมฺปิ วฑฺฒกีนํ ปฏิกฺขิปนุปายํ อปสฺสนฺติโย ตํ ปริสฺสชฺชิตฺวา โรทิตุํ อารภึสุ ฯ

ตสฺมึ สมเย โพธิสตฺโต รุกฺขเทวตํ ปสฺสิสฺสามีติ ตตฺถ คนฺตฺวา ตํ การณํ สุตฺวา โหตุ มา จินฺตยิตฺถ อหํ ตํ รุกฺขํ ฉินฺทิตุํ น ทสฺสามิ เสฺว วฑฺฒกีนํ อาคตกาเล มม การณํ ปสฺสถาติ ตา เทวตาโย สมสฺสาเสตฺวา ปุนทิวเส วฑฺฒกีนํ อาคตเวลาย กกณฺฏกเวสํ คเหตฺวา วฑฺฒกีนํ ปุรโต คนฺตฺวา มงฺคลรุกฺขสฺส มูลํ ปวิสิตฺวา ตํ รุกฺขํ สุสิรํ วิย กตฺวา รุกฺขมชฺเฌน อภิรุหิตฺวา ขนฺธมตฺถเกน นิกฺขมิตฺวา สีสํ กมฺปยมาโน นิปชฺชิ ฯ มหาวฑฺฒกี ตํ กกณฺฏกํ ทิสฺวา รุกฺขํ หตฺเถน ปหริตฺวา สุสิรรุกฺโข เอโส นิสฺสาโร หิยฺโย อนุปธาเรตฺวาว พลิกมฺมํ กริมฺหาติ เอกฆนํ มหารุกฺขํ ครหิตฺวา ปกฺกามิ ฯ รุกฺขเทวตา โพธิสตฺตํ นิสฺสาย วิมานสฺส สามิกา ชาตา ฯ ตสฺสา ปฏิสณฺฐารตฺถาย สนฺทิฏฺฐสมฺภตฺตา พหู เทวตา สนฺนิปตึสุ ฯ รุกฺขเทวตา วิมานํ เม ลทฺธนฺติ ตุฏฺฐจิตฺตา ตาสํ เทวตานํ มชฺเฌ โพธิสตฺตสฺส คุณํ กถยมาโน โภ เทวตา มยํ มเหสกฺขา เทวตา หุตฺวาปิ ทนฺธปญฺญตาย อิมํ อุปายํ น ชานิมฺหา กุสนาฬิเทวตา ปน อตฺตโน ญาณสมฺปตฺติยา อมฺเห วิมานสามิเก อกาสิ มิตฺโต นาม สทิโสปิ อธิโกปิ หีโนปิ กตฺตพฺโพเยว สพฺโพปิ อตฺตโน ถาเมน สหายานํ อุปฺปนฺนํ ทุกฺขํ นิตฺถริตฺวา สุเข ปติฏฺฐาเปนฺติเยวาติ มิตฺตธมฺมํ วณฺณยิตฺวา อิมํ คาถมาห