ตตฺถ กเร สริกฺโขติ ชาติอาทีหิ สทิโสปิ มิตฺตธมฺมํ กเรยฺย ฯ อถวาปิ เสฏฺโฐติ ชาติอาทีหิ เสฏฺโฐปิ อธิโกปิ กเรยฺย ฯ นิหีนโก จาปิ กเรยฺย เอโกติ เอโก ชาติอาทีหิ หีโนปิ มิตฺตธมฺมํ กเรยฺย ฯ ตสฺมา สพฺเพปิ เอเต มิตฺตา กาตพฺพาเยวาติ ทีเปติ ฯ กึการณา ฯ กเรยฺยุ เต พฺยสเน อุตฺตมตฺถนฺติ สพฺเพ เจเต สหายสฺส พฺยสเน อุปฺปนฺเน อตฺตโน ปตฺตภารํ วหมานา อุตฺตมตฺถํ กเรยฺยุํ กายิกเจตสิกทุกฺขโต ตํ สหายกํ โมเจยฺยุเมวาติ อตฺโถ ฯ ตสฺมา หีโนปิ มิตฺโต กาตพฺโพเยว ปเคว อิตเร ฯ ตตฺริทํ โอปมฺมํ ฯ ยถา อหํ กุสนาฬิ รุจายนฺติ ยถา อหํ รุจายํ นิพฺพตฺตเทวตา อยญฺจ กุสนาฬิเทวตา อปฺเปสกฺขา มิตฺตสนฺถวํ กริมฺหา ตตฺราปาหํ มเหสกฺขาปิ สมานา อตฺตโน อุปฺปนฺนํ ทุกฺขํ พาลตาย อนุปายกุสลตาย หริตุํ นาสกฺขึ อิมมฺปน อปฺเปสกฺขมฺปิ สมานํ ปณฺฑิตํ เทวตํ นิสฺสาย ทุกฺขโต มุตฺโตมฺหีติ ฯ ตสฺมา อญฺเญหิปิ ทุกฺขา มุจฺจิตุกาเมหิ สมวิสิฏฺฐภาวํ อโนโลเกตฺวา หีโนปิ ปณีโตปิ มิตฺโต กาตพฺโพ ฯ

รุจาเทวตา อิมาย คาถาย เทวสงฺฆสฺส ธมฺมํ เทเสตฺวา ยาวตายุกํ ฐตฺวา สทฺธึ กุสนาฬิเทวตาย ยถากมฺมํ คตา ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา รุจาเทวตา อานนฺโท อโหสิ กุสนาฬิเทวตา ปน อหเมวาติ ฯ

กุสนาฬิชาตกํ ปฐมํ ฯ