อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ปาสาณโกฏฺฏกกุเล นิพฺพตฺติตฺวา วยปฺปตฺโต ปริโยทาตสิปฺโป อโหสิ ฯ กาสีรฏฺเฐ เอกสฺมึ นิคเม เอโก มหาวิภโว เสฏฺฐี อโหสิ ฯ ตสฺส นิธานคตาเยว จตฺตาฬีส หิรญฺญโกฏิโย อเหสุํ ฯ อถสฺส ภริยา กาลํ กตฺวา ธนสิเนเหน คนฺตฺวา ธนปิฏฺฐิยํ มูสิกา หุตฺวา นิพฺพตฺติ ฯ เอวํ อนุกฺกเมน สพฺพมฺปิ ตํ กุลํ อพฺภตฺถํ อคมาสิ ฯ วํโส อุจฺฉิชฺชิ ฯ โส คาโมปิ ฉฑฺฑิโต อปณฺณตฺติกภาวํ อคมาสิ ฯ ตทา โพธิสตฺโต ตสฺมึ ปุราณคามฏฺฐาเน ปาสาเณ อุปฺปาเตตฺวา โกฏฺเฏติ ฯ อถ สา มูสิกา โคจราย จรมานา โพธิสตฺตํ ปุนปฺปุนํ ปสฺสนฺตี อุปนฺนสิเนหา หุตฺวา จินฺเตสิ มยฺหํ ธนํ พหุํ นิกฺการเณน นสฺสิสฺสติ อิมินา สทฺธึ เอกโต หุตฺวา อิมํ ธนํ ขาทิสฺสามีติ ฯ สา เอกทิวสํ เอกํ กหาปณํ มุเขน ฑํสิตฺวา โพธิสตฺตสฺส สนฺติกํ อคมาสิ ฯ โส ตํ ทิสฺวา ปิยวาจาย สมาลปนฺโต กึ นุ โข อมฺม กหาปณํ คเหตฺวา อาคตาสีติ อาห ฯ ตาต อิมํ คเหตฺวา อตฺตนาปิ ปริภุญฺช มยฺหมฺปิ มํสํ อาหราติ ฯ โส สาธูติ สมฺปฏิจฺฉิตฺวา กหาปณํ อาทาย นครํ คนฺตฺวา เอเกน มาสเกน มํสํ กิณิตฺวา อาหริตฺวา ตสฺสา อทาสิ ฯ สา ตํ คเหตฺวา อตฺตโน นิวาสนฏฺฐานํ คนฺตฺวา สารุจิยา ขาทิ ฯ ตโต ปฏฺฐาย อิมินาว นิยาเมน ทิวเส ทิวเส โพธิสตฺตสฺส กหาปณํ เทติ ฯ โสปิสฺสา มํสํ อาหรติ ฯ

อเถกทิวสํ ตํ มูสิกํ วิฬาโร อคฺคเหสิ ฯ อถ นํ สา เอวมาห สมฺม มา มํ มาเรสีติ ฯ กึการณา น มาเรยฺยามิ อหมฺหิ ฉาโต มํสํ ขาทิตุกาโม น สกฺกา มยา น มาเรตุนฺติ ฯ กึ ปน เอกทิวสเมว มํสํ ขาทิตุกาโมสิ อุทาหุ นิจฺจกาลนฺติ ฯ ลภมาโน นิจฺจมฺปิ ขาทิตุกาโมมฺหีติ ฯ ยทิ เอวํ อหนฺเต นิจฺจกาลํ มํสํ ทสฺสามิ วิสฺสชฺเชหิ มนฺติ ฯ อถ นํ วิฬาโร เตนหิ อปฺปมตฺตา โหหีติ วิสฺสชฺเชสิ ฯ ตโต ปฏฐาย สา อตฺตโน อาภตํ มํสํ เทฺว โกฏฺฐาเส กตฺวา เอกํ วิฬารสฺส เทติ เอกํ สยํ ขาทิ ฯ อถ นํ เอกทิวสํ อญฺโญปิ วิฬาโร อคฺคเหสิ ฯ ตมฺปิ ตเถว สญฺญาเปตฺวา อตฺตานํ วิสฺสชฺชาเปสิ ฯ ตโต ปฏฺฐาย ตโย โกฏฺฐาเส กตฺวา ขาทนฺติ ฯ ปุน อญฺโญ อคฺคเหสิ ฯ ตํ ตเถว สญฺญาเปตฺวา อตฺตานํ โมจาเปสิ ฯ ตโต ปฏฺฐาย จตฺตาโร โกฏฺฐาเส กตฺวา ขาทนฺติ ฯ ปุน อญฺโญ อคฺคเหสิ ฯ ตํ ตเถว สญฺญาเปตฺวา อตฺตานํ โมจาเปสิ ฯ ตโต ปฏฺฐาย ปญฺจ โกฏฺฐาเส กตฺวา ขาทนฺติ ฯ สา ปญฺจมโกฏฺฐาสํ ขาทมานา อปฺปหารตาย กิลนฺตา กีสา อโหสิ อปฺปมํสโลหิตา ฯ