โพธิสตฺโต ตํ ทิสฺวา อมฺม กสฺมา มิลาตาสีติ วตฺวา อิมินา นาม การเณนาติ วุตฺโต ตฺวํ เอตฺตกํ กาลํ กสฺมา มยฺหํ นาจิกฺขสิ อหเมตฺถ กตฺตพฺพํ ชานิสฺสามีติ ตํ สมสฺสาเสตฺวา สุทฺธผลิกปาสาเณน คุหํ กตฺวา อาหริตฺวา อมฺม ตฺวํ อิมํ คุหํ ปวิสิตฺวา นิปชฺชิตฺวา อาคตาคตานํ ผรุสาหิ วาจาหิ สนฺตชฺเชยฺยาสีติ อาห ฯ สา คุหํ ปวิสิตฺวา นิปชฺชิ ฯ อเถโก วิฬาโร อาคนฺตฺวา เทหิ เม มํสนฺติ อาห ฯ อถ นํ มูสิกา อเร ทุฏฺฐวิฬาร กินฺเต อหํ มํสหาริกา อตฺตโน ปุตฺตานํ มํสํ ขาทาติ สนฺตชฺเชสิ ฯ วิฬาโร ผลิกคุหาย นิปนฺนภาวํ อชานนฺโต โกธวเสน มูสิกํ คณฺหิสฺสามีติ สหสา ปกฺขนฺทิตฺวา หทเยน ผลิกคุหายํ ปหรติ ฯ ตาวเทวสฺส หทยํ ภิชฺชิ อกฺขีนิ นิกฺขมนาการปฺปตฺตานิ ชาตานิ ฯ โส ตตฺเถว ชีวิตกฺขยํ ปตฺวา เอกมนฺตํ ปฏิจฺฉนฏฺฐาเน ปตติ ฯ เอเตนุปาเยน อปโรปิ อปโรปีติ จตฺตาโรปิ ชนา ชีวิตกฺขยํ ปาปุณึสุ ฯ ตโต ปฏฺฐาย มูสิกา นิพฺภยา หุตฺวา โพธิสตฺตสฺส เทวสิกํ เทฺว ตโย กหาปเณ เทติ ฯ เอวํ อนุกฺกเมน สพฺพมฺปิ ธนํ โพธิสตฺตสฺเสว อทาสิ ฯ เต อุโภปิ ยาวชีวํ เมตฺตึ อภินฺทิตฺวา ยถากมฺมํ คตา ฯ

สตฺถา อิมํ ธมฺมเทสนํ อาหริตฺวา อภิสมฺพุทฺโธ หุตฺวา อิมํ คาถมาห

ยตฺเถโก ลภเต พพฺหุ ทุติโย ตตฺถ ชายติ

ตติโย จ จตุตฺโถ จ อิทนฺเต พพฺพุกา พิลนฺติ ฯ