๑๐. กากชาตกํ

นิจฺจํ อุพฺพิคฺคหทยาติ อิทํ สตฺถา เชตวเน วิหรนฺโต ญาตตฺถจริยํ อารพฺภ กเถสิ ฯ ปจฺจุปฺปนฺนวตฺถุํ ทฺวาทสนิปาเต ภทฺทสาลชาตเก อาวิภวิสฺสติ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กากโยนิยํ นิพฺพตฺติ ฯ อเถกทิวสํ รญฺโญ ปุโรหิโต พหินคเร นทิยํ นฺหายิตฺวา คนฺเธหิ วิลิมฺเปตฺวา มาลํ ปิลนฺธิตฺวา วรวตฺถนิวตฺโถ นครํ ปวิสติ ฯ นครทฺวารโตรณคฺเค เทฺว กากา นิสินฺนา โหนฺติ ฯ เตสุ เอโก เอกํ อาห สมฺม อหํ อิมสฺส พฺราหฺมณสฺส มตฺถเก สรีรวลญฺชํ ปาเตสฺสามีติ ฯ อิตโร มา เต เอวํ รุจิ อยํ พฺราหฺมโณ อิสฺสโร อิสฺสรชเนน สทฺธึ เวรํ นาม ปาปกํ อยญฺหิ กุทฺโธ สพฺเพปิ กาเก วินาเสยฺยาติ ฯ น สกฺกา ตํ มยา น ปาเตตุนฺติ ฯ เตนหิ ปญฺญายิสฺสสีติ วตฺวา อิตโร กาโก ปลายิ ฯ โส โตรณสฺส เหฏฺฐาภาคํ สมฺปตฺเต พฺราหฺมเณ โอลมฺพกํ ธาเรนฺโต วิย ตสฺส มตฺถเก วจฺจํ ปาเตสิ ฯ พฺราหฺมโณ กุชฺฌิตฺวา กาเกสุ เวรํ พนฺธิ ฯ

ตสฺมึ กาเล เอกา ภติยา วีหิโกฏฺฏิกทาสี วีหี เคหทฺวาเร อาตเป ปฏฺฐริตฺวา รกฺขนฺตี นิสินฺนาว นิทฺทํ โอกฺกมิ ฯ ตสฺสา ปมาทํ ญตฺวา เอโก ทีฆโลมโก เอฬโก อาคนฺตฺวา วีหี ขาทิ ฯ สา ปพุชฺฌิตฺวา ตํ ทิสฺวา ปลาเปสิ ฯ เอฬโก ทุติยมฺปิ ตติยมฺปิ ตสฺสา ตเถว นิทฺทายนกาเล อาคนฺตฺวา วีหี ขาทิ ฯ สาปิ นํ ติกฺขตฺตุํ ปลาเปตฺวา จินฺเตสิ ปุนปฺปุนํ ขาทนฺโต อุปฑฺฒวีหึ ขาทิสฺสติ พหุ เม เฉโท ภวิสฺสติ อิทานิสฺส ปุน อนาคมนการณํ กริสฺสามีติ ฯ สา อลาตํ คเหตฺวา นิทฺทายมานา วิย นิสีทิตฺวา วีหี ขาทนตฺถาย เอฬเก สมฺปตฺเต อุฏฺฐาย อลาเตน เอฬกํ ปหริ ฯ โลมานิ อคฺคึ คณฺหึสุ ฯ โส สรีเร ฌายนฺเต อคฺคึ นิพฺพาเปสฺสามีติ เวเคน คนฺตฺวา หตฺถิสาลาย สมีเป เอกิสฺสา ติณกุฏิยา สรีรํ ฆํสิ ฯ สา ปชฺชลิ ฯ ตโต อุฏฺฐิตชาลา หตฺถิสาลํ คณฺหิ ฯ หตฺถิสาลาสุ ฌายนฺตีสุ หตฺถิปิฏฺฐานิ ฌายึสุ ฯ พหู หตฺถี วณิตสรีรา อเหสุํ ฯ เวชฺชา หตฺถี อโรเค กาตุํ อสกฺโกนฺตา รญฺโญ อาโรเจสุํ ฯ ราชา ปุโรหิตํ อาห อาจริย หตฺถิเวชฺชา หตฺถี ติกิจฺฉิตุํ น สกฺโกนฺติ อปิ กิญฺจิ เภสชฺชํ ชานาสีติ ฯ ชานามิ มหาราชาติ ฯ กึ ลทฺธุํ วฏฺฏตีติ ฯ กากวสา มหาราชาติ ฯ เตนหิ กาเก มาเรตฺวา วสํ อาหรถาติ อาห ฯ ตโต ปฏฺฐาย กาเก มาเรตฺวา วสํ อลภิตฺวา ตตฺถ ตตฺเถว ราสึ กโรนฺต ฯ กากานํ มหาภยํ อุปฺปนฺนํ ฯ