ตทา โพธิสตฺโต อสีติสหสฺสกากปริวาโร มหาสุสาเน วสติ ฯ เอโก กาโก อาคนฺตฺวา กากานํ อุปฺปนฺนํ ภยํ โพธิสตฺตสฺส อาโรเจสิ ฯ โส จินฺเตสิ ฐเปตฺวา มํ อญฺโญ มยฺหํ ญาตกานํ อุปฺปนฺนํ ภยํ หริตุํ สมตฺโถ นตฺถิ หริสฺสามิ นนฺติ ทส ปารมิโย อาวชฺเชตฺวา เมตฺตาปารมึ ปุเรจาริกํ กตฺวา เอกเวเคเนว ปกฺขนฺทิตฺวา วิวฏมหาวาตปาเน ปวิสิตฺวา รญฺโญ อาสนสฺส เหฏฺฐา ปาวิสิ ฯ อถ นํ เอโก มนุสฺโส คเหตุกาโม อโหสิ ฯ ราชา สรณํ ปวิฏฺโฐ มา คณฺหีติ วาเรสิ ฯ มหาสตฺโต โถกํ วิสฺสมิตฺวา เมตฺตาปารมึ อาวชฺเชตฺวา เหฏฺฐาสนา นิกฺขมิตฺวา ราชานํ อาห มหาราช รญฺญา นาม ฉนฺทาทิวเสน อคนฺตฺวา รชฺชํ กาเรตุํ วฏฺฏติ ยํ ยํ กมฺมํ กตฺตพฺพํ โหติ สพฺพํ นิสมฺม อุปธาเรตฺวา กาตุํ วฏฺฏติ ยญฺจ กริยมานํ นิปฺปชฺชติ ตเทว กาตุํ วฏฺฏติ น อิตรํ สเจ หิ ราชาโน กริยมานํ น นิปฺปชฺชติ ตํ กโรนฺติ มหาชนสฺส มรณภยปริโยสานํ มหาภยํ อุปฺปชฺชติ ปุโรหิโต เวรวสิโก หุตฺวา มุสาวาทํ อภาสิ กากานํ วสา นาม นตฺถีติ ฯ ตํ สุตฺวา ราชา ปสนฺนจิตฺโต โพธิสตฺตํ กาญฺจนภทฺทปีเฐ นิสีทาเปตฺวา ตตฺถ นิสินฺนสฺส ปกฺขนฺตรานิ สตปากสหสฺสปากเตเลหิ มกฺขาเปตฺวา กาญฺจนตฏฺฏเก ราชารหํ สุจิโภชนํ โภชาเปตฺวา ปานียํ ปาเยตฺวา สุหิตํ วิคตทรกํ มหาสตฺตํ เอตทโวจ ปณฺฑิต ตฺวํ กากานํ วสา นาม นตฺถีติ วเทสิ เกน การเณน เนสํ วสา นตฺถีติ ฯ โพธิสตฺโต อิมินา จ อิมินา จ การเณนาติ สกลนิเวสนํ เอกสทฺทํ กตฺวา ธมฺมํ เทเสนฺโต อิมํ คาถมาห

นิจฺจํ อุพฺพิคฺคหทยา สพฺพโลกวิเหสกา

ตสฺมา เนสํ วสา นตฺถิ กากานมฺหาก ญาตินนฺติ ฯ

ตตฺรายํ สงฺเขปตฺโถ มหาราช กากา นาม นิจฺจํ อุพฺพิคฺคมานสา ภยปฺปตฺตาว วิหรนฺติ ฯ สพฺพโลกวิเหสกาติ ขตฺติยาทโย มนุสฺเสปิ อิตฺถีปุริเสปิ กุมารกุมาริกาทโยปิ วิเหเฐนฺตา กิลมนฺตา วิจรนฺติ ตสฺมา อิเมหิ ทฺวีหิ การเณหิ เนสํ อมฺหากํ ญาตีนํ กากานํ วสา นาม นตฺถิ อตีเตปิ อภูตปุพฺพา อนาคเตปิ น ภวิสฺสนฺตีติ ฯ