อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สิคาลโยนิยํ ปฏิสนฺธึ คเหตฺวา อรญฺเญ นทีตีเร นิวาสํ กปฺเปสิ ฯ อเถโก ชรหตฺถี คงฺคาตีเร กาลมกาสิ ฯ สิคาโล โคจรปฺปสุโต ตํ หตฺถิสรีรํ ทิสฺวา มหา เม โคจโร อุปฺปนฺโนติ ตํ คนฺตฺวา โสณฺเฑ ฑํสิ ฯ นงฺคลีสาย ทฏฺฐกาโล วิย อโหสิ ฯ โส นตฺเถตฺถ ขาทิตพฺพยุตฺตกนฺติ ทนฺเตสุ ฑํสิ ฯ ถมฺเภ ทฏฺฐกาโล วิย อโหสิ ฯ กณฺเณ ฑํสิ ฯ สุปฺปโกฏิยํ ทฏฺฐกาโล วิย อโหสิ ฯ อุทเร ฑํสิ ฯ กุสูเล ทฏฺฐกาโล วิย อโหสิ ฯ ปาเท ฑํสิ ฯ อุทุกฺขเล ทฏฺฐกาโล วิย อโหสิ ฯ นงฺคุฏฺเฐ ฑํสิ ฯ มุสเล ทฏฺฐกาโล วิย อโหสิ ฯ โส เอตฺถาปิ นตฺถิ ขาทิตพฺพยุตฺตกนฺติ สพฺพตฺถ อสฺสาทํ อลภนฺโต วจฺจมคฺเค ฑํสิ ฯ มุทุปูเว ทฏฺฐกาโล วิย อโหสิ ฯ โส ลทฺธนฺทานิ เม อิมสฺมึ สรีเร มุทุํ ขาทิตพฺพยุตฺตกฏฺฐานนฺติ ตโต ปฏฺฐาย ขาทิตฺวา อนฺโตกุจฺฉึ ปวิสิตฺวา วกฺกหทยาทีนิ ขาทิตฺวา ปิปาสิตกาเล โลหิตํ ปิวิตฺวา นิปชฺชิตุกามกาเล อุทรํ โอตฺถริตฺวา นิปชฺชติ ฯ อถสฺส เอตทโหสิ อิทํ หตฺถิสรีรํ มยฺหํ นิวาสนสุขตาย เคหสทิสํ ขาทิตุกามตาย สติ ปหูตมํสํ กินฺทานิ เม อญฺญตฺถ คมนนฺติ ฯ โส อญฺญตฺถ อคนฺตฺวา หตฺถิกุจฺฉิยเมว มํสํ ขาทิตฺวา วสติ ฯ

คจฺฉนฺเต คจฺฉนฺเต กาเล นิทาฆสมเย วาตสมฺผสฺเสน เจว สุริยรสฺมิสนฺตาเปน จ ตํ กุณปํ สุสฺสิตฺวา วลิโย คณฺหิ ฯ สิคาลสฺส ปวิฏฺฐทฺวารํ ปิหิตํ ฯ อนฺโตกุจฺฉิ อนฺธกาโร อโหสิ ฯ สิคาลสฺส โลกนฺตริกนิวาโส วิย ชาโต ฯ กุณเป สุสฺสนฺเต มํสมฺปิ สุสฺสิ ฯ โลหิตมฺปิ ปจฺฉิชฺชิ ฯ โส นิกฺขมนทฺวารํ อลภนฺโต ภยปฺปตฺโต หุตฺวา สนฺธาวนฺโต อิโต จิโต จ ปหริตฺวา นิกฺขมนทฺวารํ ปริเยสมาโน วิจรติ ฯ เอวํ ตสฺมึ อุกฺขลิยํ ปิฏฺฐปิณฑํ วิย อนฺโตกุจฺฉิยํ นิปชฺชมาเน กติปาหจฺจเยน มหาเมโฆ ปาวสฺสิ ฯ อถ นํ กุณปํ เตมิตฺวา อุฏฺฐาย ปกติสณฺฐาเนน อฏฺฐาสิ ฯ วจฺจมคฺโค วิวโฏ หุตฺวา ตารกา วิย ปญฺญายิ ฯ สิคาโล ตํ ฉิทฺทํ ทิสฺวา อิทานิ เม ชีวิตํ ลทฺธนฺติ ยาว หตฺถิสีสา ปฏิกฺกมิตฺวา เวเคน ปกฺขนฺทิตฺวา วจฺจมคฺคํ สีเสน ปหริตฺวา นิกฺขมิ ฯ ตสฺส สุสฺสินฺนสรีรตฺตา สพฺพโลมานิ วจฺจมคฺเคเยว อลฺลียึสุ ฯ โส ตาลกฺขนฺธสทิเสน นิลฺโลเมน สรีเรน อุพฺพิคฺคจิตฺโต มุหุตฺตํ ธาวิตฺวา นิวตฺติตฺวา นิสินฺโน สรีรํ โอโลเกตฺวา อิทํ ทุกฺขํ มยฺหํ น อญฺเญน กตํ โลภเหตุ ปน โลภการณา โลภํ นิสฺสาย มยา เอตํ กตํ อิโตทานิ ปฏฺฐาย น โลภวสิโก ภวิสฺสามิ ปุน หตฺถิสรีรนฺนาม น ปวิสิสฺสามีติ สํวิคฺคหทโย หุตฺวา อิมํ คาถมาห