รมณียา วต โภ โทสินา รตฺติ กํ นุ โข อชฺช มยํ สมณํ วา พฺราหฺมณํ วา ปยิรูปาเสยฺยาม ยนฺโน ปยิรูปาสตํ จิตฺตํ ปสีเทยฺยาติ ฯ อเถโก อมจฺโจ ปุรณกสฺสปสฺส วณฺณํ กเถสิ เอโก มกฺขลิโคสาลสฺส เอโก อชิตเกสกมฺพลสฺส เอโก ปกุธกจฺจายนสฺส เอโก สญฺชยเวฬฏฺฐปุตฺตสฺส เอโก นาฏปุตฺตนิคฺคณฺฐสฺสาติ ฯ ราชา เตสํ กถํ สุตฺวา ตุณฺหี อโหสิ ฯ โส หิ ชีวกสฺเสว มหามจฺจสฺส กถํ ปจฺจาสึสติ ฯ ชีวโกปิ รญฺญา มํ อารพฺภ กถิเตเยว ชานิสฺสามีติ อวิทูเร ตุณฺหี นิสีทิ ฯ อถ นํ ราชา อาห ตฺวํ ปน สมฺม ชีวก กึ ตุณฺหีติ ฯ ตสฺมึ ขเณ ชีวโก อุฏฺฐายาสนา เยน ภควา เตนญฺชลิมฺปณาเมตฺวา เอโส เทว ภควา อรหํ สมฺมาสมฺพุทฺโธ อมฺหากํ อมฺพวเน วิหรติ สทฺธึ อฑฺฒเตรเสหิ ภิกฺขุสเตหิ ตญฺจ ปน ภควนฺตํ เอวํ กลฺยาโณ กิตฺติสทฺโท อพฺภุคฺคโตติ นวสตานิ ปาฏิหาริยานิ ชาติโต ปฏฺฐาย ปุพฺพนิมิตฺตาทิเภทํ ภควโต อานุภาวํ ปกาเสตฺวา ตํ ภควนฺตํ เทโว ปยิรูปาสตุ ธมฺมํ สุณาตุ ปญฺหํ ปุจฺฉตูติ อาห ฯ ราชา สมฺปุณฺณมโนรโถ หุตฺวา เตนหิ สมฺม ชีวก หตฺถิยานานิ กปฺปาเปหีติ ยานานิ กปฺปาเปตฺวา มหนฺเตน ราชานุภาเวน ชีวกมฺพวนํ คนฺตฺวา ตตฺถ มณฺฑลมาเล ภิกฺขุสงฺฆปริวุตํ ตถาคตํ ทิสฺวา สนฺตวีจิมชฺเฌ มหานาวํ วิย นิจฺจลํ ภิกฺขุสงฺฆํ อิโต จิโต จ อนุวิโลเกตฺวา เอวรูปา นาม เม ปริสา น ทิฏฺฐปุพฺพาติ อิริยาปเถเยว ปสีทิตฺวา สงฺฆสฺส อญฺชลึ ปคฺคณฺหิตฺวา ถุตึ วตฺวา ภควนฺตํ วนฺทิตฺวา เอกมนฺตํ นิสินฺโน สามญฺญผลปญฺหํ ปุจฺฉิ ฯ อถสฺส ภควา ทฺวีหิ ภาณวาเรหิ ปฏิมณฺฑิตํ สามญฺญผลสุตฺตนฺตํ กเถสิ ฯ โส สุตฺตปริโยสาเน อตฺตมโน ภควนฺตํ ขมาเปตฺวา อุฏฺฐายาสนา ปทกฺขิณํ กตฺวา ปกฺกามิ ฯ

สตฺถา อจิรปกฺกนฺตสฺส รญฺโญ ภิกฺขู อามนฺเตตฺวา ขตายํ ภิกฺขเว ราชา อุปหตายํ ภิกฺขเว ราชา สจายํ ภิกฺขเว ราชา อิสฺสริยสฺส การณา ปิตรํ ธมฺมิกํ ธมฺมราชานํ ชีวิตา น โวโรเปสฺสติ อิมสฺมึเยว อาสเน วิรชํ วีตมลํ ธมฺมจกฺขุํ อุปฺปชฺชิสฺสติ เทวทตฺตมฺปน นิสฺสาย อสนฺตํ สมฺปคฺคหํ กตฺวา โสตาปตฺติผลา ปริหีโนติ อาห ฯ ปุนทิวเส ภิกฺขู ธมฺมสภายํ กถํ สมุฏฺฐาเปสุํ อาวุโส อชาตสตฺตุ กิร อสนฺตํ สมฺปคฺคหํ กตฺวา ทุสฺสีลํ ปาปธมฺมํ เทวทตฺตํ นิสฺสาย ปิตุฆาตกมฺมสฺส กตตฺตา โสตาปตฺติผลา ปริหีโน เทวทตฺเตน นาสิโต ราชาติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อชาตสตฺตุ อิทาเนว อสนฺตํ สมฺปคฺคหํ กตฺวา มหาวินาสํ ปตฺโต ปุพฺเพเปส อสนฺตํ สมฺปคฺคเหเนว อตฺตานํ นาเสสีติ วตฺวา อตีตํ อาหริ ฯ