ทฬฺหํ ทฬฺหสฺส ขิปตีติ อิทํ สตฺถา เชตวเน วิหรนฺโต ราโชวาทํ อารพฺภ กเถสิ ฯ

โส เตสกุณชาตเก อาวิภวิสฺสติ ฯ เอกสฺมึ ปน ทิวเส โกสลราชา เอกํ อคติคตํ ทุพฺพินิจฺฉยํ อฏฺฏํ วินิจฺฉินิตฺวา ภุตฺตปาตราโส อลฺลหตฺโถ ว อลงฺกตรถํ อภิรุยฺห สตฺถุ สนฺติกํ คนฺตฺวา ผุลฺลปทุมสสฺสิริเกสุ ปาเทสุ นิปติตฺวา สตฺถารํ วนฺทิตฺวา เอกมนฺตํ นิสีทิ ฯ อถ นํ สตฺถา เอตทโวจ หนฺท กุโต นุ ตฺวํ มหาราช อาคจฺฉสิ ทิวาทิวสสฺสาติ ฯ ภนฺเต อชฺช เอกํ อคติคตํ ทุพฺพินิจฺฉยํ อฏฺฏํ วินิจฺฉินนฺโต โอกาสํ อลภิตฺวา อิทานิ ตํ วิจาเรตฺวา ภุญฺชิตฺวา อลฺลหตฺโถ ว ตุมฺหากํ อุปฏฺฐานํ อาคโตมฺหีติ ฯ สตฺถา มหาราช ธมฺเมน สเมน อฏฺฏวินิจฺฉยํ นาม กุสลํ สคฺคมคฺโค เอว, อนจฺฉริยํ โข ปเนตํ ยํ ตุมฺเห มาทิสสฺส สพฺพญฺญุสฺส สนฺติกา โอวาทํ ลภมานา ธมฺเมน อฏฺฏํ วินิจฺฉิเนยฺยาถ, เอตเทว อจฺฉริยํ ยํ ปุพฺเพ ราชาโน อสพฺพญฺญูนมฺปิ ปณฺฑิตานํ โอวาทํ สุตฺวา ธมฺเมน สเมน อฏฺฏํ วินิจฺฉินนฺโต จตฺตาริ อคติคมนานิ วิวชฺเชตฺวา ทสราชธมฺเม อโกเปตฺวา ธมฺเมน รชฺชํ กาเรตฺวา สคฺคปทํ ปูริยมานา อคมํสูติ วตฺวา เตน ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส อคฺคมเหสิยา กุจฺฉิสฺมึ ปฏิสนฺธึ คเหตฺวา ลทฺธคพฺภปริหาโร โสตฺถินา มาตุ กุจฺฉิมฺหา นิกฺขมิ ฯ นามคหณทิวเส ปนสฺส พฺรหฺมทตฺตกุมาโรเตฺวว นามํ กรึสุ ฯ โส อนุปุพฺเพน วยปฺปตฺโต โสฬสวสฺสิกกาเล ตกฺกสิลํ คนฺตฺวา สพฺพสิปฺเปสุ นิปฺผตฺตึ ปตฺวา ปิตุอจฺจเยน รชฺเช ปติฏฺฐาย ธมฺเมน สเมน รชฺชํ กาเรสิ, ฉนฺทาทิวเสน อคตึ อคนฺตฺวา วินิจฺฉยํ อนุสาสิ ฯ ตสฺมึ เอวํ ธมฺเมน รชฺชํ กาเรนฺเต อมจฺจาปิ ธมฺเมเนว โวหารํ วินิจฺฉินึสุ ฯ โวหาเรสุ ธมฺเมน วินิจฺฉิยมาเนสุ กูฏฏฺฏกา นาม น อเหสุํ ฯ เตสํ อภาวา อฏฺฏตฺถาย ราชงฺคเณ อุปรโว ปจฺฉิชฺชิ ฯ อมจฺจา ทิวสมฺปิ วินิจฺฉยฏฺฐาเน นิสีทิตฺวา กญฺจิ วินิจฺฉยตฺถาย อาคจฺฉนฺตํ อทิสฺวา อุฏฺฐาย ปกฺกมนฺติ ฯ วินิจฺฉยฏฺฐานํ ฉฑฺเฑตพฺพภาวํ ปาปุณิ ฯ โพธิสตฺโต จินฺเตสิ มยิ ธมฺเมน รชฺชํ กาเรนฺเต วินิจฺฉยตฺถาย อาคจฺฉนฺตา นาม นตฺถิ, อุปรโว ปจฺฉิชฺชิ, วินิจฺฉยฏฺฐานํ ฉฑฺเฑตพฺพภาวํ ปตฺตํ, อิทานิ มยา อตฺตโน อคุณํ ปริเยสิตุํ วฏฺฏติ, อยํ นาม เม อคุโณติ ญตฺวา ตํ ปหาย คุเณสุ เยว วตฺติสฺสามีติ ฯ ตโต ปฏฺฐาย อตฺถิ นุ โข เม โกจิ อคุณวาทีติ ปริคฺคณฺหนฺโต อนฺโตวลญฺชนกานํ อนฺตเร กญฺจิ อคุณวาทึ อทิสฺวา อตฺตโน คุณกถเมว สุตฺวา เอเต มยฺหํ ภเยนาปิ อคุณํ อวตฺวา คุณเมว วเทยฺยุนฺติ พหิวลญฺชนเก ปริคฺคณฺหนฺโต ตตฺถาปิ อทิสฺวา อนฺโตนครํ ปริคฺคณฺหิ ฯ พหินคเร จตูสุ ทฺวาเรสุ ทฺวารคามเก ปริคฺคณฺหิ ฯ ตตฺถาปิ กญฺจิ อคุณวาทึ อทิสฺวา อตฺตโน คุณกถเมว สุตฺวา ชนปทํ ปริคฺคณฺหิสฺสามีติ อมจฺเจ รชฺชํ ปฏิจฺฉาเปตฺวา รถํ อภิรุยฺห สารถิเมว คเหตฺวา อญฺญาตกเวเสน นครา นิกฺขมิตฺวา ชนปทํ ปริคฺคณฺหมาโน ยาว ปจฺจนฺตภูมึ คนฺตฺวา กญฺจิ อคุณวาทึ อทิสฺวา อตฺตโน คุณกถเมว สุตฺวา ปจฺจนฺตสีมโต มหามคฺเคน นคราภิมุโขเยว นิวตฺติ ฯ