สีโห ตสฺส วจนํ สุตฺวา สมฺม สูกร อชฺช อมฺหากํ ตยา สทฺธึ สงฺคาโม นตฺถิ, อิโต ปน สตฺตเม ทิวเส อิมสฺมึ เยว ฐาเน สงฺคาโม โหตูติ วตฺวา ปกฺกามิ ฯ สูกโร สีเหน สทฺธึ สงฺคาเมสฺสามีติ ตุฏฺฐปหฏฺโฐ ตํ ปวุตฺตึ ญาตกานํ อาโรเจสิ ฯ เต ตสฺส กถํ สุตฺวา ภีตภีตา อิทานิ ตฺวํ สพฺเพปิ อมฺเห นาเสสฺสสิ, อตฺตโน พลํ อชานิตฺวา สีเหน สทฺธึ สงฺคามิตุกาโมสิ, สีโห อาคนฺตฺวา สพฺเพปิ อมฺเห ชีวิตกฺขยํ ปาเปสฺสติ, สาหสิกํ กมฺมํ มา กรีติ อาหํสุ ฯ โส ภีตตสิโต อิทานิ กึ กโรมีติ ปุจฺฉิ ฯ สูกรา สมฺม ตฺวํ เอเตสํ ตาปสานํ อุจฺจารภูมิยํ คนฺตฺวา ปูติคูเถ สตฺตทิวสานิ สรีรํ วตฺเตตฺวา สรีรํ สุกฺขาเปตฺวา สตฺตเม ทิวเส สรีรํ อุสฺสาวพินฺทูหิ เตเมตฺวา สีหสฺส อาคมนโต ปุริมตรํ อาคนฺตฺวา วาตโยคํ ญตฺวา อุปริวาเต ติฏฺฐ, สุจิชาติโก สีโห ตว สรีรคนฺธํ ฆายิตฺวา ตุยฺหํ ชยํ ทตฺวา คมิสฺสตีติ อาหํสุ ฯ โส ตถา กตฺวา สตฺตเม ทิวเส ตตฺถ อฏฺฐาสิ ฯ สีโห ตสฺส สรีรคนฺธํ ฆายิตฺวา คูถมกฺขิตภาวํ ญตฺวา สมฺม สูกร สุนฺทโร เต เลโส จินฺติโต, สเจ ตฺวํ คูถมกฺขิโต นาภวิสฺส, อิเธว ตํ ชีวิตกฺขยํ ปาเปสฺสํ, อิทานิ ปน เต สรีรํ เนว มุเขน ฑํสิตุํ น ปาเทน ปหริตุํ สกฺโกมิ, ชยํ เต ทมฺมีติ วตฺวา ทุติยํ คาถมาห

อสุจิ ปูติโลโมสิ, ทุคฺคนฺโธ วายสิ สูกร,

สเจ ยุชฺฌิตกาโมสิ, ชยํ สมฺม ททามิ เตติ ฯ

ตตฺถ ปูติโลโมสีติ มฬฺหมกฺขิตตฺตา ทุคฺคนฺธโลโม ฯ ทุคฺคนฺโธ วายสีติ อติเชคุจฺฉปติกฺกูลคนฺโธ หุตฺวา วายสิ ฯ ชยํ สมฺม ททามิ เตติ ตุยฺหํ ชยํ เทมิ ฯ