ตตฺถ ภคฺคาติ ปิตรํ นาเมน อาลปติ ฯ อปรานิ จ วีสตีติ อปรานิ จ วีสติ วสฺสานิ ชีว ฯ มา มํ ปิสาจา ขาทนฺตูติ มา มํ ปิสาโจ ขาทตุ ฯ ชีว ตฺวํ สรโทสตนฺติ ตฺวํ ปน วีสุตฺตรวสฺสสตํ ชีวาติ ฯ สรโทสตญฺหิ คณิยมานํ วสฺสสตํ เอว โหติ ฯ ตํ ปุริเมหิ วีสาย สทฺธึ วีสุตฺตรํ อิธ อธิปฺเปตํ ฯ

ยกฺโข โพธิสตฺตสฺส วจนํ สุตฺวา อิมํ ตาว มาณวํ ชีวาติ วุตฺตตฺตา ขาทิตุํ น สกฺโกมิ, ปิตรํ ปนสฺส ขาทิสฺสามีติ ปิตุ สนฺติกํ อคมาสิ ฯ โส ตํ อาคจฺฉนฺตํ ทิสฺวา อยํ โข ปฏิชีวาติ อภณนฺตานํ ขาทกยกฺโข ภวิสฺสตีติ ปฏิชีวํ กริสฺสามีติ ปุตฺตํ อารพฺภ ทุติยํ คาถมาห

ตฺวมฺปิ วสฺสสตํ ชีว อปรานิ จ วีสติ,

วิสํ ปิสาจา ขาทนฺตุ, ชีว ตฺวํ สรโทสตนฺติ ฯ