เอวํ นิสฺสยสมฺปนฺโน ภิกฺขุ อารทฺธวีริโย

ภาวยํ กุสลํ ธมฺมํ โยคกฺเขมสฺส ปตฺติยา

ปาปุเณ อนุปุพฺเพน สพฺพสํโยชนกฺขยนฺติ ฯ

ตตฺถ อลีนจิตฺตํ นิสฺสายาติ อลีนจิตฺตํ ราชกุมารํ นิสฺสาย ฯ ปหฏฺฐา มหตี จมูติ ปเวณิรชฺชํ โน ลทฺธนฺติ หฏฺฐตุฏฺฐา หุตฺวา มหตี เสนา ฯ โกสลํ เสนาสนฺตุฏฺฐนฺติ โกสลราชานํ เสน รชฺเชน อสนฺตุฏฺฐํ ปรรชฺชโลเภน อาคตํ ฯ ชีวคาหํ อคาหยีติ อมาเรตฺวา ว สา จมู ตํ ราชานํ หตฺถินา ชีวคาหํ คณฺหาเปสิ ฯ เอวํ นิสฺสยสมฺปนฺโนติ ยถา สา จมู เอวํ อญฺโญปิ กุลปุตฺโต นิสฺสยสมฺปนฺโน กลฺยาณมิตฺตํ พุทฺธํ วา พุทฺธสาวกํ วา ปจฺเจกพุทฺธํ วา นิสฺสยํ ลภิตฺวา ฯ ภิกฺขูติ ปริสุทฺธาธิวจนเมตํ ฯ อารทฺธวีริโยติ ปคฺคหิตวิริโย จตุโทสาปคเตน วิริเยน สมนฺนาคโต ฯ ภาวยํ กุสลํ ธมฺมนฺติ กุสลํ นิราลยํ ธมฺมํ สตฺตตึสโพธิปกฺขิยสงฺขาตธมฺมํ ภาเวนฺโต ฯ โยคกฺเขมสฺส ปตฺติยาติ จตูหิ โยเคหิ เขมสฺส นิพฺพานสฺส ปาปุณตฺถาย ตํ ธมฺมํ ภาเวนฺโต ฯ ปาปุเณ อนุปุพฺเพน สพฺพสํโยชนกฺขยนฺติ เอวํ วิปสฺสนโต ปฏฺฐาย อิมํ กุสลํ ธมฺมํ ภาเวนฺโต โส กลฺยาณมิตฺตุปนิสฺสยสมฺปนฺโน ภิกฺขุ อนุปุพฺเพน วิปสฺสนาญาณานิ จ เหฏฺฐิมานิ มคฺคผลานิ จ ปาปุณนฺโต ปริโยสาเน ทสนฺนมฺปิ สํโยชนานํ ขยนฺเต อุปฺปนฺนตฺตา สพฺพสํโยชนกฺขยสงฺขาตํ อรหตฺตํ ปาปุณาติ ฯ ยสฺมา จ นิพฺพานมาคมฺม สพฺเพ สํโยชนา ขียนฺติ ตสฺมา ตมฺปิ สพฺพสํโยชนกฺขยเมว ฯ เอวํ อนุปุพฺเพน นิพฺพานสงฺขาตํ สพฺพสํโยชนกฺขยํ ปาปุณาตีติ อตฺโถ ฯ