ตตฺถ เย พฺราหฺมณาติ เย พาหิตปาปา วิสุทฺธิพฺราหฺมณา ฯ เวทคูติ เวทานํ ปารํ คตาติ เวทคู ฯ เวเทหิ ปารํ คตาติปิ เวทคู ฯ อิธ ปน สพฺเพ สงฺขตาสงฺขเต ธมฺเม วิทิเต ปากเฏ กตฺวา คตา ติณฺณํ มารานํ มตฺถกํ ภินฺทิตฺวา ทสสหสฺสีโลกธาตุํ อุนฺนาเทตฺวา โพธิตเล สมฺมาสมฺโพธึ ปตฺวา สํสารปารํ อติกฺกนฺตาติ อตฺโถ ฯ เต เม นโมติ เต มม อิมํ นมการํ ปฏิจฺฉนฺตุ ฯ เต จ มํ ปาลยนฺตูติ เอวํ มยา นมสฺสิตา จ เต ภควนฺโต มํ ปาลยนฺตุ รกฺขนฺตุ โคเปนฺตุ ฯ นมตฺถุ พุทฺธานํ, นมตฺถุ โพธิยา, นโม วิมุตฺตานํ, นโม วิมุตฺติยาติ อยํ มม นมกาโร อตีตานํ ปรินิพฺพุตานํ พุทฺธานํ อตฺถุ ฯ เตสญฺเญว จตูสุ มคฺเคสุ จตูสุ ผเลสุ ญาณสงฺขาตาย โพธิยา อตฺถุ ฯ ตถา เตสญฺเญว อรหตฺตผลวิมุตฺติยา วิมุตฺตานํ อตฺถุ ฯ ยา จ เนสํ ตทงฺควิมุตฺติ วิกฺขมฺภนวิมุตฺติ สมุจฺเฉทวิมุตฺติ ปฏิปสฺสทฺธิวิมุตฺติ นิสฺสรณวิมุตฺตีติ ปญฺจวิธา วิมุตฺติ, ตสฺสา เนสํ ปญฺจวิมุตฺติยาปิ อยํ มยฺหํ นมกาโร อตฺถูติ ฯ อิมํ โส ปริตฺตํ กตฺวา โมโร จรติ เอสนาติ อิทํ ปน ปททฺวยํ สตฺถา อภิสมฺพุทฺโธ หุตฺวา อาห ฯ ตสฺสตฺโถ ภิกฺขเว โส โมโร อิมํ ปริตฺตํ อิมํ รกฺขํ กตฺวา อตฺตโน โคจรภูมิยํ ปุปฺผผลาทีนํ อตฺถาย นานปฺปการาย เอสนาย จรติ ฯ

เอวํ ทิวสํ จริตฺวา สายํ ปพฺพตมตฺถเก นิสีทิตฺวา อฏฺฐํคจฺฉนฺตํ สุริยํ โอโลเกตฺวา พุทฺธคุเณ อาวชฺเชตฺวา นิวาสนฏฺฐาเน รกฺขาวรณตฺถาย ปุน พฺรหฺมมนฺตํ พนฺธนฺโต อเปตยนฺติ อาทิมาห

อเปตยญฺจกฺขุมา เอกราชา

หริสฺสวณฺโณ ปฐวิปฺปภาโส,