ปญฺเจเต ชีวโลกสฺมึ อนิมิตฺตา น ญายเรติ ฯ ฉนฺโน กาโล น ทิสฺสตีติ ยสฺมา อสุกสฺมึ นาม วยกาเล วา เหมนฺตาทิ- อุตุกาเล วา มยา มริตพฺพนฺติ มยฺหมฺเปส ฉนฺโน กาโล น ทิสฺสติ สุปฏิจฺฉนฺโน หุตฺวา ฐิโต น ปญฺญายติ ฯ ตสฺมา อภุตฺวา ภิกฺขามีติ เตน การเณน กามคุเณ อภุตฺวา ว ภิกฺขามิ ฯ มา มํ กาโล อุปจฺจคาติ มํ สมณธมฺมสฺส กรณกาโล มา อติกฺกมตุ, อิมินา การเณน ทหโรว สมาโน ปพฺพชิตฺวา สมณธมฺมํ กโรมีติ ฯ

เทวธีตา โพธิสตฺตสฺส วจนํ สุตฺวา ตตฺเถว อนฺตรธายิ ฯ

สตฺถา อิมํ ธมฺมเทสนํ อาหริตฺวา, ชาตกํ สโมธาเนสิ ฯ ตทา เทวธีตา อยญฺจ เทวธีตา, อหเมว เตน สมเยน ตาปโส อโหสินฺติ ฯ

สมิทฺธิชาตกํ สตฺตมํ ฯ